ಕಳೆದ ವರುಷ ...ನೆನಪು... ಮಾತ್ರ...

ನೆನಪಿನ ರಾಶಿಗೆ...ಇನ್ನೊಂದು ವರುಷ ಸೇರಿದೆ. ಹಲವು ಬೆಳವಣಿಗೆಯಲ್ಲಿ, ಮನ ಈ ವರ್ಷ ನೀನು ಅಂದುಕೊಂಡ ಕೆಲಸವೆಲ್ಲ  ಯಶಸ್ವಿಯಾಗಿ  ಮುಗಿಸಿದ್ದಿಯಾ... ಎಂದು ಪ್ರಶ್ನಿಸಿದರೆ ಎಂಬ ಅಂಜಿಕೆಯಿಂದ ... ನಾನೇ.. ಸ್ವಲ್ಪ ಸಾಧ್ಯವಾಯಿತು  ಕ್ಷಮಿಸು ಮನವೇ ನಿನ್ನ ಸಹಕಾರದಿಂದ ಇದೆಲಾ ಸಾಧ್ಯ... ಖಂಡಿತ ಈ ವರ್ಷ ನಾನು ಅಂದುಕೊಳ್ಳುವ ಕೆಲಸದ ಜೊತೆ ಹಳೆ ಬಾಕಿ ತೀರಿಸಿಕೊಳ್ಳುತ್ತೇನೆ ಎಂಬ ಆತ್ಮೀಯ ನಿರ್ಧಾರಾತ್ಮಕ ಭರವಸೆ ನೀಡಿದ್ದೇನೆ.

ನನಗಂತೂ ೨೦೧೧ ಖುಷಿ ವರ್ಷವೇ ಆಗಿತ್ತು. ಖುಷಿಯಾಗದ ಕ್ಷಣವನ್ನು ಹೇಳುವದಿಲ್ಲ.... ಅದಕ್ಕೆಲ್ಲ ಉತ್ತರ... ಪರಿಹಾರದತ್ತ  ನನ್ನ ಚಿತ್ತ... ಅನೇಕರ ಸಹಕಾರ ಪಡೆದಿದ್ದೇನೆ. ಅವರಿಗೆಲ್ಲ ಧನ್ಯವಾದದೊಂದಿಗೆ.... ಹೀಗೆ ಸಹಕಾರ... ಪ್ರೀತಿ... ಮುಂದುವರೆಸಿ...ಹರಸಿ ಎನ್ನುವೆ.

ಭವಿಷ್ಯವನ್ನು  ಟೀವಿ ಪರದೆಯ  ಮೇಲೆ ತುಂಬಿ ಭವಿಷ್ಯವನ್ನು ಹೇಳುತ್ತಿರುವ ಜ್ಯೋತಿಷ್ಯಿಗಳನ್ನು / ಅವರ ಮಾತನ್ನು  ಕೇಳಿ ಒಮ್ಮೆ ಬೆಚ್ಚಿದ್ದರೂ ಟೀವಿ  ಚಾನಲ್ ಬೇರೆ ಮಾಡಿ ಇಟ್ಟಿದ್ದೇನೆ.

ಖಂಡಿತ ಕೇಕ್ ತರದೇ ನಾನೇ ಪ್ರೀತಿಯಿಂದ ಹೊಸ  ನಾಳೆಗೆಂದು ಸಿಹಿ ಮಾಡಿದ್ದೇನೆ. ರುಚಿ ಮಾಡಿಯಾಗಿದೆ. ತುಂಬಾ ಚೆನ್ನಾಗಿದೆ.  ಅದನ್ನೂ ನನ್ನ ಅಡುಗೆ ಬ್ಲಾಗ್  ಮನೆಯ ಶಕ್ತಿ ... ಯಲ್ಲಿ ಹಾಕುವೆ.
ಹೊಸ  ವರ್ಷಕ್ಕೆ .... ಇನ್ನೂ ಹರ್ಷಕ್ಕೆ ಕಾಯುತ್ತಿರುವೆ.....
ನಿಮ್ಮೆಲ್ಲರ....ಖುಷಿ ಜಾಸ್ತಿಯಾಗಲಿ....

2012

ಚಂದ್ರಿಕಾ ಹೆಗಡೆ

ಬ್ಲಾಗನ್ನೇ ಮರೆತೆಯಾ...

ಬ್ಲಾಗನ್ನೇ ಮರೆತೆಯಾ... 

ಎಂದು ನನ್ನನ್ನೇ ನಾನು ಕೇಳಿ ಕೊಂಡು ಸೋತು... ದೀಪಾವಳಿ ಗೆ ಆದರೂ  "ನಾಲ್ಕು ಸಾಲು ಬರೆದೆ ತೀರುತ್ತೇನೆ"  ಎಂಬ  ತೀರ್ಮಾನಕ್ಕೆ ಬಂದು ಮುದ್ದು ಕಂದನನ್ನು ಅವನ ಅಬ್ಬೆಯ  ಹತ್ತಿರ ಬಿಟ್ಟು ,  ಡಾಕ್ತ್ರ ತ್ರ ಹೋಗಿ ಬರ್ತೀನಿ  ಎಂಬ ಅಮ್ಮಂದಿರ ಸಾರ್ವಕಾಲಿಕ ಸುಳ್ಳಿನ ಬೀಜವನ್ನು  ಅವನ ಮುಂದೆ ಇಟ್ಟು.... ಸುಮ್ಮನೆ ಅಡಗಿ ಕುಳಿತು ಬರೆಯುತ್ತಿದ್ದೇನೆ....ಮಗನ ಹತ್ರ ಮನದಲ್ಲೇ ಕ್ಷಮೆ ಕೇಳಿ...

ಮಗನ ಖಿಲಾಡಿ, ನನ್ನ  ಮನಸನ್ನು ಹಿಡಿದು(ಬಡಿದು!) ...ಒಮ್ಮೊಮ್ಮೆ ಜಾಸ್ತಿಯಾಯ್ತೆನೂ.. ಅಂತ ಇರುವ ಪ್ರೀತಿಯ ಫ್ರೆಂಡ್ಸ್ ಗೆ ಫೋನಾಯಿಸಿ  ನಿನ್ನ ಮಗನು ಹೀಗೆ ಮಾಡ್ತಾನ... ಮಾಡ್ತಿಡ್ನ,,,ಭೂತ... ವರ್ತಮಾನವನ್ನು ಕೇಳಿ.. ನನ್ನ ಭವಿಷ್ಯವನ್ನು ಗಟ್ಟಿ ಮಾಡಿಕೊಳ್ಳುತ್ತಿದ್ದೇನೆ. ಪ್ರಶ್ನೆ ಕೇಳಿ ತಲೆ ತಿನ್ನಬೇಡ...ಅಂತ ಬಯ್ಯುತ್ತಲೇ  ಮನದಲ್ಲೇ  "ಆಯ್ತೆನು ಪ್ರಶ್ನೆ ಕೇಳಿ, ಇನ್ನೊಂದಿಸ್ಟು ಕೇಳೋ...." ಮುಂದುವರೆಯುತ್ತಿದೆ. 

.................ಏನೇನೋ ಬರವಣಿಗೆ... ಓದು... ಕೆಲಸ... ಬಿದ್ದಿದ್ದ ಮನಸನ್ನು ಇನ್ನಾದರೂ ಕೊಡವಿ  ಬರೋಣ ಎಂದರೆ ... ಇನ್ನು ಮತ್ತೆ ೧೫ ದಿನ ಬಹು ಮುಖ್ಯ ಕೆಲಸ!.. ಸ್ನೇಹಿತರ ಬ್ಲಾಗ್ ನೋಡದೆ ಅದೆಸ್ಟು ದಿನ ಆಯಿತೋ

ಮತ್ತೊಂದು ವಿಷಯ ಸ್ನೇಹಿತರೆ.... ಅದೊಂದು ದಿನ ನಾನು ಹೀಗೆ ಒಬ್ಬರ ಹತ್ತಿರ ಮಾತನಾಡುತಿದ್ದಾಗ . ಇಂಟರ್ನೆಟ್ ಒಂದು ಚಟ - ಅದನ್ನ ಬಿಡಕ್ಕೆ ಆಗಲ್ಲ .... ಒಮ್ಮೆ  ಬಿಟ್ ನೋಡಿ ಹಾಗಾದ್ರೆ ಅಂತಾ  ಹೇಳಿದ್ರು... ಅವರ ಮಾತಿಗೂ ಒಂದು ಬೆಲೆ ಕೊಟ್ಟು ನೋಡಿದೆ  ನನಗೇನು ಚಟದ ಹಾಗೆ ಅನ್ನಿಸ್ತ ಇಲ್ಲ...ಅಂತ ಈಗ ಹೇಳಿ ಬಿಟ್ಟೆ ...

ನಿಮ್ಮ ಅನಿಸಿಕೆ.....ನನ್ನ ನಿರೀಕ್ಷೆ....!

ಮನದ ಚಿತ್ತಾರ.... ಬಣ್ಣ ಹಲವು... !

ಚಂದ್ರಿಕಾ ಹೆಗಡೆ

ಕಳೆದ ಬೇಸಿಗೆ ರಜಾ.....

ಅಮೋಘವಾದ ಬಾಲ್ಯವನ್ನು ಅತ್ಯದ್ಭುತವಾಗಿ ಕಳೆದಿದ್ದೇವೆ.
ಮಳೆಗಾಲದಲ್ಲಿ ಆರಂಭಗೊಂಡ ಶಾಲಾ ಕ್ರಿಯೆ- ಕರ್ಮ ಮಾರ್ಚ್ ವೇಳೆ ಮುಗಿಯುವ ಹಂತ. ಮಧ್ಯದಲ್ಲಿ ಅಕ್ಟೋಬರ್  ರಜಾ... ಇದರಲ್ಲಿ ....ತೋಟದಲ್ಲಿ ಇದ್ದಷ್ಟು ಗೆಂಟಿಗೆ ಹೂಗಳನ್ನು ಹೊರಲಾಗದೆ ಬಾಗಿ ಹೋದ ಜಡೆಗಳಲ್ಲಿ ನೇಲಾಡಿಸಿಯೋ... ಇಲ್ಲ ದಂಡೆಯ ಹಣೆದು ಗಂಭಿರವಾಗಿ ಇದ್ದ ಮುಡಿಗಳಲ್ಲಿಯೋ ಬಿಗಿ ಬೊಂದೊವಸ್ತು ಮಾಡಿ... ಹೂವು ಹಳೆಯ ವಾಸನೆ ಬರುವ ವರೆಗೂ ಮುಡಿದಿದ್ದೇವೆ ಎಂಬುದನ್ನು ಮರೆತು...ಇನ್ನೊಬ್ಬರ ತಲೆಯ ಮೇಲೆ  ಕಣ್ಣಿರಿಸಿ  ಬಣ್ಣಕ್ಕೆ ಮಾರುಹೊಗುತ್ತಿದ್ದ ಸಮಯ ಈಗ ಕೈನಲ್ಲಿ ಇಲ್ಲ!ಕೋಕೋ ಹಣ್ಣನ್ನು ತಿಂದು ವ್ಯಾಕ್ ಎಂದವರು, ಚಪ್ಪರಿಸಿದವರು,  ಚಿನ್ನಿದಾಂಡು ಆಡುವಾಗ ಕೆರೆಯಲ್ಲಿ ಬಿದ್ದು ಸದ್ದಿಲ್ಲದೇ ಮೈಯ ತೊಳೆದು ಕೊಂಡವರು, ಮಾವಿನ ಕಾಯಿ ಕೊಯ್ದು ಕೊಟ್ಟವನಿಗೆ ಪಂಗನಾಮ ಹಾಕಿ  ಟಾಟಾ ಅಂದವರು.. ಪಾಸಾಗಿ ನಾನು ಫಸ್ಟ್   ಎಂದು ಬೇರೆ ಕಡೆಯಿಂದ ಬಂದ ನಮಗೆ ಸುಳ್ಳನ್ನು ಹೇಳಿ ಎಸ.ಎಸ.ಎಲ್.ಸಿ ಯಲ್ಲಿ ಡುಮ್ಕಿ ಹೊಡೆದವರು.. ಭಟ್ಟರ ಮನೆಯ ಮೊಗೆ ಬಳ್ಳಿಯನ್ನು ಸದ್ದಿಲ್ಲದೇ ನಾಪತ್ತೆ ಮಾಡಿ.. ಸೈ ಎನ್ನಿಸಿಕೊಂಡ ಧೀಮಂತರು! ಸಗಣಿಯನ್ನು  ತಿಂದು "ಭರ್ಜರಿ ಮಾಣಿ" ಎಂಬ ಪಟ್ಟ ತಾನೇ ಕಟ್ಟಿ ಕೊಂಡವನು, ಕಣ್ಣ ಮುಚ್ಚಾಲೆ ಆಡಲು ಹೋಗಿ ಅಡಗಿ ಕೊಂಡು ಅಲ್ಲೇ ನಿದ್ದೆ ಮಾಡಿ, ಮನೆಯವರಿಂದ ಉಗಿಸಿ ಕೊಂಡವರು, ಇವರೆಲ್ಲ ಜಗತ್ತಿನ ಯಾವುದೋ ಭಾಗಕ್ಕೆ ಏನನ್ನೋ ಹುಡುಕಿ ಹೋಗಿದ್ದಾರೆ. ಗೆಂಟಿಗೆ ಕಾಲ ಮುಗಿದು ಚಳಿಗಾಲ ಕಳೆದು ಪರೀಕ್ಷೆಯ ಫಲಿತಾಂಶ  ನಿರ್ಧಾರಿತ ದಿನಾಂಕ ನಿನ್ನೆ ಮೊನ್ನೆ ಆಗಿದೆ ಮುಗಿದಿದೆ. ೧೦೦ ಕ್ಕೆ ೧೦೦ ಪಾಸು ಅಂತ ಗೊತ್ತಿದ್ದೂ ತಿರಗ ಬರುವಾಗ ನಾನು ಪಾಸು ಎಂದು ಸಂತೋಷ ಪಡುವ ಗೆಳೆಯರು , ಶಾಲೆಯ ಎದುರಿಗೆ ಒಂದು ಕಲ್ಲು ಒದೆಯುತ್ತ , ಎಷ್ಟೋ ಕಿಲೋಮೀಟರು ಆ ಕಲ್ಲನ್ನೇ ಗುರಿಯಾಗಿಸಿ ಮನೆ ತಲುಪುವ ಘಳಿಗೆ .... ಒಂದು ಸಲ ನಿಮಗೂ ಅನ್ನಿಸುವದಿಲ್ಲವೇ ...? ನಮ್ಮ ಕೈ ತಪ್ಪಿದ ಸಮಯ ಎಂದು?
ಯಾಕಾದರೂ ಶಾಲೆ ಮುಗಿಯಿತೋ? ನಾವಿಲ್ಲದೇ ಆ ಗೇರು ಮರ, ಸಂಪಿಗೆ ಮರಗಳು ಎಷ್ಟು ಅನಾಥ ಪ್ರಜ್ಞೆಯಿಂದ ನರಳುತ್ತವೋ ... ಎಂಬ ಭಾವ ಅಂದಿನ ಶಾಲಾ ಸಮಯದವು. ಹಸಿ ಗೇರು   ಬೀಜದ ಮೂತಿಯನ್ನು  ಉಜ್ಜಿ ಉಜ್ಜಿ  ಜೋರಾಗಿ ಕಾಲಲ್ಲಿ ಒತ್ತಿ ದಾಗ  ಪಿಚ್ ಎಂದು ಹೊರಗೆ ಬರುವ ಹುಂಗಿನಲ್ಲಿ ಅದೇನು ರುಚಿ! ಗೇರು ಬೀಜದ ಕಲೆಯಾಗ ಬಾರದು ಎಂದು ಗೇರು ಹಣ್ಣಿನ ರಸದಲ್ಲಿ ತಿಕ್ಕಬೇಕೆನ್ನುವ ಸಂಶೋಧನೆಯ  ಹಕ್ಕು ಸ್ವಾಮ್ಯ ಯಾರದೋ ಬಲ್ಲವರು ಯಾರು.. ಅದಕ್ಕಾಗಿ ಜಗಳವೂ ಇಲ್ಲವಲ್ಲ!
ಗೇರು ಹಣ್ಣಿನ ಮೇಲೆ ಉಪ್ಪನ್ನು ಸವರಿ... ಆಹಾ... ಅದೇನು ಅದ್ಭುತ ಸವಿ...

........................
ಎಷ್ಟು ಬೇಗ ಕಳೆಯಿತು ಸುಂದರ ಬಾಲ್ಯ... ಅಜ್ಜನ ಮನೆಗೆ ೨-೩ ವರ್ಷಕ್ಕೆ ಒಮ್ಮೆ ಹೋಗುವ ಘಳಿಗೆ ಈಗ ವರ್ಷಕ್ಕೆ ಒಮ್ಮೆ ಬಂದರು ಆ ಮಜಾ ಸಿಗುತ್ತಿಲ್ಲ. ಆಗಿನ ಒಂದು ಎರಡು ಹೊಸ ಅಂಗಿ ಇಂದು ಕಬಾರ್ಡಿನ ತುಂಬೆಲ್ಲ ಇರುವ  ರೇಷ್ಮೆಯ ಯಾವ ಡ್ರೆಸ್   ಅದಕ್ಕೆ ಸಮ ಅಲ್ಲ. ಅಂದಿನ ಹವಾಯಿ ಚಪ್ಪಲ್ಲಿಗೆ ಇಂದಿನ ಯಾವುದೇ ಹೈ ಹೀಲ್ಡ್  ಸರಿ ಸಾಟಿ ಅಲ್ಲವೇ ಅಲ್ಲ. ಕೇರಳ ಕ್ಕೆಂದು( ಅಜ್ಜನ ಮನೆ) ಹೋಗುವಾಗ ಸಂಭ್ರಮಿಸುವ ರೀತಿ ,ಬರುವಾಗಿನ ಬೇಸರ... ಇಂದು ಮಾಮೂಲು. ಭಾವನೆ ಚಿಕ್ಕದಾಗಿದೆ!
ಹೀಗೆಲ್ಲ ನೆನಪಾಗಿದ್ದು ಮಾವ " ಯಾವಾಗ ಅಜ್ಜನ ಮನೆಗೆ  ಬಪ್ಪದು"  ಎಂದು ಕರೆ ಮಾಡಿದಾಗ. ಪ್ರೀತಿಯ ಅಜ್ಜಿಗೆ ವಯಸ್ಸು ಆಗಿ, ಕೂಗಿ ಹೇಳಬೇಕು. ಮಾವನಿಗೆ ತನ್ನ ಮಗನ ಮಗಳ ವಿದ್ಯಾಭ್ಯಾಸ , ಭವಿಷ್ಯದ ಚಿಂತೆ, ಅತ್ತೆಗೆ ಸಂಸಾರ...ಜವಾಬ್ದಾರಿ... ನಡುವೆ ನಮ್ಮನ್ನು ಪ್ರೀತಿಯಿಂದ  ಕರೆಯುವ ಪರಿಗೆ ಓ ಅಂದು ಹೊರಟಿದ್ದೇವೆ. " ಒಂದೆರಡು ದಿನ ಇರೆಕ್ಕು... "ಪಾಲ್ ಪಾಯಸ " ಮಾಡುತ್ತೇನೆ ಎಂದ ಮಾವನಿಗೆ ಹುಂ ಅಂದಿದ್ದೇನೆ. ಉದಯ್ ನ ನಿರಂತರ ಕೆಲಸಕ್ಕೆ ಸ್ವಲ್ಪ ವಿರಾಮ ..ಅವನು ಉಮೇದಿನಿಂದ ಹೊರಟಿದ್ದಾನೆ...ಟಾಟಾ ಹೋಗುವದಿದ್ದು ಎಂದಾಗಲೆಲ್ಲ ಊಟ  ಸರಿಯಾಗಿ ಮಾಡುವ ಮಗ, ಮುಂದಿನ ವಾರದ ಕೆಲಸವನ್ನೆಲ್ಲಾ ಮೊದಲೇ ಮುಗಿಸ ಬೇಕೆಂದು ಯೋಜನೆಯಲ್ಲಿ ಉದಯ್,......... ಜಯನಗರ  , ಮಂತ್ರಿ ಸ್ಕ್ವೇರ್ , ಕಮರ್ಷಿಯಲ್ ಸ್ಟ್ರೀಟ್, ಎಂದು ಎಲ್ಲೂ ಸರಿಯಾಗದೆ ಹತ್ತಿರದ ಗಾಂಧೀ ಬಜಾರ್ ನಲ್ಲೆ ಶಾಪಿಂಗ್ ಮಾಡಿದ ನಾನು, ....
ಅಂದು ಅಪ್ಪನ ಒಂದು ಸುಟ್ ಕೇಸ್ ನಲ್ಲೆ ಇಡಿ ಸಂಸಾರದ ಬಟ್ಟೆ -ಬರೆಯ ಹೊರುವಿಕೆ; ಇಂದು ೩ ಜನರಿಗೆ ಬರೋಬ್ಬರಿ ೪ ಬ್ಯಾಗ್ ಹೊತ್ತು.. ಪ್ರಯಾಣ ಆರಂಭ.
     ಪ್ರಯಾಣಕ್ಕೆ ನಿಮ್ಮ ಹಾರೈಕೆ- ಆಶೀರ್ವಾದ ಇರಲಿ ಸದಾ!

 ---------------------- ತರಾತುರಿಯಲ್ಲಿ ಮೂಡಿದ ಬರಹ
                            ಚಂದ್ರಿಕಾ ಹೆಗಡೆ 

ಎಚ್ಚರಿಕೆ

ಭಾವಕ್ಕೆ ವೇಷ ತೊಡಿಸಿ 

ಸಿಕ್ಕಿದ್ದನೆಲ್ಲಾ  ಬಯಲಿನಲ್ಲಿ  ತೆರೆದಿಡಬೇಡ...

ಬಿರುಗಾಳಿ ಬಂದು ತರಗೆಲೆಯಾಗಿ 

ಚಿಂದಿಯಾದೀತು ಜೋಕೆ!

ಹೆಣೆದ ಮಾತನ್ನು ಹಂಚಿಕೊಳ್ಳದಿರು

ಬಲೆಯಲ್ಲಿಯ ಮೀನಿನಂತೆ 

ನಿನ್ನ ಮನ ವಿಲಿ ವಿಲಿ ಒದ್ದಾಡೀತು ಜೋಕೆ!

ಸಿಕ್ಕಂತೆ ಸಿಕ್ಕರೂ ಜನ

ಸ್ನೇಹಿತರು, ಗೆಳೆಯ-ಗೆಳತಿಯರು

ಕುದಿವ ಮನಕೆ ಆರೈಕೆ ನೀಡಲು 

ತಣಿಯದಿರು....

ಕಾದ ಎಣ್ಣೆಯಲ್ಲಿ ಹಾಕಬಹುದು ಹುಷಾರು!

ಹೋಳಿಗೆ ನೀಡುವ ನೆಪದಲಿ--

ಕಾದ ಕಬ್ಬಿಣವ  ಕಿವಿಗಿಡಬಹುದು,

ಗಾಯದ ಮೇಲೆ ಬರೆಯೂ .....

ಜತನವೆಂಬುದು ನಿನ್ನ ಜವಾಬ್ದಾರಿ...

..............................................ಚಂದ್ರಿಕಾ ಹೆಗಡೆ

ಕಾದ ಮಾತು...

ಮರುಭೂಮಿಯೆಡೆ  ಒಂದು ಮರ

ತನ್ನಿ ಸನಿಹದ ಜಲವ ರೂಕ್ಷಗೊಳಿಸಿ

ಬೇರುಗೊಲೆಯಾದುದ ನಾ ಕಂಡೆ .

ಕಳವಳಗೊಂಡ ಸ್ವಂತ ಮನಸು

ನಿನ್ನ ಸಮಾಧಾನದ ಹಂಗಿಗೆ

 ಕಾದು ಕುಳಿತಿದೆ ಕಾಡಬೇಡ.

ಕೊಳೆತ ಜಿಡ್ಡು ಜಿಡ್ಡಾದ ಮನವ

ತೊಳೆಯುವಲ್ಲಿ ಸಹಕರಿಸು , ತಿಳಿನೀರಿನಿಂದಲೇ .

ಕುಡಿವ ನೀರಿಗೆ

 ಕೊಳೆ ತೊಳೆಯುವ  ಭಾಗ್ಯ?

ಮನ -ಕಾದುಕೊಂಡ ಮರಳು

ನೀ, ಎಷ್ಟೇ ನೀರ ಹನಿಸಿದರೂ

ಮಾಯ! ನಾ ಬಲ್ಲೆ.

ತಿಳಿ ತಿಳಿದು ಕಾಯುವ ನನ್ನೀ

ಕಾತುರಗಳು ಕೊಂಡಿ ಕೊಂಡಿಯಲ್ಲೇ

ಒತ್ತಟ್ಟಿಕೊಂಡಿವೆ ಗಾಢ ಬಂಧನದ ಬಿಸುಪಿನಲ್ಲಿ

ಮಂದ ಮಾರುತ ಮರೆಯಲ್ಲಿದೆ

ಸೌರಭ ಇನ್ನೆಲ್ಲಿ?

ಮನದ ತೊಳಲಾಟಕ್ಕಿಂತ

ನಾಲಿಗೆ ಹೊರಳುವಿಕೆ ಲೇಸು!

ಪ್ರಕಟ ಸಕಾಲಿಕ ೨೦೦೪ ಅಗಸ್ಟ್ ೨೬

ಕವನ ಬರೆದು ನಿರುಮ್ಮಳಾದ ಕ್ಷಣ ...

                                           ಚಂದ್ರಿಕಾ ಹೆಗಡೆ

ಇವತ್ತು ಬಂದ ಊರಿನ ಸವಿ ಸವಿಯಲ್ಲಿ.....

ಮಾವ ಊರಿಗೆ ಹೋಗುವದನ್ನೇ ಕಾಯುತ್ತಿದ್ದೆ. ನನ್ನ ಲಿಸ್ಟ್ ಸಿದ್ಧವಾಗಿತ್ತು . ಅದ್ರಲ್ಲಿ ಮೊದಲು ಸಂಪಿಗೆ ಹಣ್ಣು. ಈಗ ಸಂಪಿಗೆ ಹಣ್ಣಿನ ಸಮಯ... ಮತ್ತೆ ಹೊಸ ಬೆಲ್ಲ... ಆಲೆಮನೆಯ ಸಮಯ... ಕಬ್ಬು... ಮಾವಿನ ಮಿಡಿ.... ಹೀಗೆ ಲಿಸ್ಟ್ ದೊಡ್ಡದಾಯಿತು... 

ಮಾವ ಕೂಡ ಹಿಂದೆಯಿಲ್ಲ... ತನ್ನ ಫ್ರೆಂಡ್ಸ್ ಮಕ್ಕಳ ಹತ್ತಿರ ಎಲ್ಲವನ್ನು ಲಿಸ್ಟ್ ಕೊಟ್ಟು...ನನ್ನಲ್ಲಿ  ಮತ್ತೆ ಇನ್ನೆನ್ತಾದ್ರು ಇದ್ದ... ಹೇಳು ಹೇಳಿ ಪ್ರೀತಿಯಿಂದಲೇ ಕೇಳಿದ್ದರೆ... ನಾನು ಏನು ಇಲ್ಲ ಅನ್ನುವದರ ಬದಲಾಗಿ ... ನೆನಪು  ಮಾಡ್ಕಂಡು ಹೇಳ್ತೆ  ಎಂಬ ಉತ್ತರ... ನನ್ನ ಮಗನ ಲಿಸ್ಟೇ ಬೇರೆ!... ಪಕ್ಕದ ಮನೆಯ ಆಂಟಿ  ನಿನ್ನ ತಾತ ಎಲ್ಲಿ ಅಂತ ಕೇಳಿದ್ರೆ ಅಭಿಮಾನ ದಿಂದ ದಾಚಾ( ದ್ರಾಕ್ಷಿ)ಹಣ್ಣು ಬಾನಾ(ಬಾಳೆಹಣ್ಣು banana ) ತಂ.. ಹೋದಾ.... ಹೇಳೋ ಉತ್ತರ ಬೇರೆ .....

ಇನ್ನು ಅಮ್ಮ: ಎಂತಾ ಬೇಕೇ... ಅವಳಲ್ಲಿನ ಲಿಸ್ಟ್ ಬೇರೇನೆ... ಅರಿಶಿನ ಹಿಟ್ಟು  ಕೊಡೆ ಮಾರಾಯ್ತಿ ... ಮಾಡ್ಸಿದ್ದು... ನನ್ನ ಪಾಲಿಗೆ ಹುಳಿಸೆಹಣ್ಣು... ಒಣ ಮೆಣೆಸು ಸ್ವಚ್ಚಾ ಮಾಡಿ  ಕೊಡು...ಗೋಳಿ ಸೊಪ್ಪು ... ಎಲೆಗುರಿಗೆ ಸೊಪ್ಪು... ಎಲ್ಲಾ ಕಳಿಸು...

ಮಗಳೆನ್ನುವ... ಪ್ರೀತಿಯ  ಅಮ್ಮ...

ಸೊಸೆಯಾದರು ಮಗಳೆನ್ನುವ  ಮಾವ .... 

ಬದುಕಿಗೆ ಇನ್ನೇನು ಬೇಕು ಅಲ್ವೇ!

 ಊರಿಂದ ಬಂದ ಪ್ರೀತಿಯ ....ಸಂಗತಿಗಳು... 

ಕಬ್ಬು ಬೆಳೆದು ಪ್ರೀತಿಯಿಂದ ಕಳುಹಿಸಿದವರಿಗೆ... 

ನನ್ನ ಧನ್ಯವಾದ...

ವರ್ಷ ಪೂರ್ತಿ ಊಟದ ಜೊತೆ ಸಾಥ್ ಕೊಡುವ ಉಪ್ಪಿನಕಾಯಿ ... ಅಪ್ಪೆಮಿಡಿ ... ಎತ್ತರದಿಂದ ಕೊಯ್ದು ಪ್ರೀತಿಯಲ್ಲಿ ಕೊಟ್ಟವರಿಗೆ... ಕೃತಜ್ಞ 

ಸಂಪಿಗೆ ಹಣ್ಣು ನೆನಪಿಟ್ಟು ತಂದ ಮಾವ ಹಾಗು ಕಳುಹಿಸಿದ ಅವರ ದೋಸ್ತ್  ಗೆ ನಮಸ್ತೆ...

ನಿಮಗೆ ಒಂದೇ ಹಣ್ಣು ಹಾಂ!

ಇವತ್ತು ಬಂದ ಊರಿನ ಸವಿ ಸವಿಯಲ್ಲಿ.... ಪುರುಸೊತ್ತು ಇಲ್ಲದೆಯೇ...ಸವಿಯಲ್ಲಿ  ತಲ್ಲಿನ..

ಚಂದ್ರಿಕಾ ಹೆಗಡೆ

 

ಕನಸ ರೂಪು

ಕನಸುಗಳೇ ಹಾಗೆ !
ಮನ ಬಡಿದೆಬ್ಬಿಸಿ
ತಿಣುಕಾಡಿಸಿ ಕಾಡುವ
ಬಯಕೆಗಳ ರೂಪ..

ಕನಸುಗಳೇ ಹಾಗೆ !
ಬಂಧ , ಭಾವಗಳ
ಸಮ್ಮೋಹದಲಿ  ಮಿಂದು
ಬೆಂದು ನೆನಪಿಸುವ ರೂಪ...


ಕನಸುಗಳೇ ಹೀಗೆ!
ಕಂಡ ಕಂಡಿದ್ದನೆಲ್ಲಾ
ಮರಳಿಸಿ , ಕುಲುಕಾಡಿಸಿ
ಮತ್ತೆ ಮತ್ತೆ ತೋರುವ ರೂಪ..


ಕನಸುಗಳೇ ಹೀಗೆ !
ಮೌನ ವಾಗಿದ್ದುಕೊಂಡೇ
ಮನದಾಳದಿಂದ ಬರುವ
ನೋವು ನಲಿವಿನ ರೂಪ!

ಕನಸಿಗೊಂದು  ರೂಪು ಕೊಡುವ ಸಮಯ ನನ್ನದು..
ಚಂದ್ರಿಕಾ ಹೆಗಡೆ
(ಸಾಪ್ತಾಹಿಕ  ಸೌರಭದಲ್ಲಿ ೨೫-೦೫-೨೦೦೩ ರಲ್ಲಿ  ಪ್ರಕಟ).

ಓ ನನ್ನ ಕಲ್ಪನೆಯೇ

  

                                 ಓ ನನ್ನ ಕಲ್ಪನೆಯೇ .....

ಇರುವ ಒಂದೆರಡು ಕ್ಷಣಗಳಲ್ಲಿ ನಿನ್ನದೆಂತಹ ಸಾಮರ್ಥ್ಯ..ಮುಂದಿನ ದಿನಗಳಿಗೆ ದೂಡುವ ಸಾರಥ್ಯದ ಅತಿಥಿಯೇ ...ಚಂದ್ರ ಬಳಿ ತಾರೆಂಬ ಮಗುವಿನ ಹಠ ನಿನ್ನಿಂದಲೇ.. ಬಳಿ ಬಂದರೆ ಆಟವಾಡಬಹುದೆಂಬ ಸ್ಪೂರ್ತಿ ನಿನ್ನದೇನೆ ....

ಪ್ರೀತಿಯ ಬಯಕೆಯ ಯೌವನದಲ್ಲಿ ಸೌಂದರ್ಯದ ಪರಿಜ್ಞಾನ ನಿನ್ನದೇ... ಇಂತಹ ದಿರಿಸೇ ಬೇಕೆಂಬ ಪ್ರಜ್ನೆಯಿತ್ತದ್ದು ನಿ ಅಲ್ಲವೇ?

ಓ ... ಆಶಯದ ಕಲ್ಪನೆಯೇ ವಿಚಿತ್ರ ನೋಡು ನೀನು ... ಪ್ರೀತಿ ಸಿಂಚನದ ಆಮಿಷವೊಡ್ಡಿ ಪ್ರೀತಿ ಕುರುಡಾಗುವದೂ ನಿನ್ನಿಂದಲೇ 

ಹುಡುಗಿ ಸತ್ತಳು... ಓಡಿಹೋದಳು...ಎಲ್ಲ ನಿನ್ನದೇ ತಾನೇ?

ನಾಳೆಯ ಕಾಯುವಿಕೆ ನಿನ್ನೆಯ ಹಸಿ ಬಿಸಿ ಸತ್ಯ ವರ್ತಮಾನದ ಘಟನೆಗಳೆಲ್ಲಾ ...... ಮತ್ತೇನು ನಿನ್ನದೇ!

"ಮಗು- ಮದುವೆ- ಮೊಮ್ಮಗು"

ಹೆಂಡತಿ -ಗೆಳತಿ ಪ್ರೀತಿಯ ಸೋರಿಕೆ ನಿನ್ನಿಂದಲೇ!

ಕಲ್ಪನೆಯೇ....

" ಬಾಳು ಬೆಳಕಾಗಿಸು ಬರಿದಾಗಿಸಬೇಡ...

ಬದುಕು ಹಸನಾಗಿಸು ಒಣಗಿಸಬೇಡ....

ಕತ್ತಲಲ್ಲಿ ದೀಪ ದೊಡ್ದದಾಗಿರದಿದ್ದರು

ಮೊಂಬತ್ತಿಯನ್ನಾದರೂ  ಬೆಳಗಿಸು"

ಬದುಕೆಂದರೆ ನೀನೆ ಗೊತ್ತು...

ಬದುಕಿನ ಕೊನೆಯೆಂದರೆ ನೀನಾಗಬೇಡ...

ಒಲವಿನ ಕಾರಣ ನೀನೆ...

ಒಲ್ಲದ ಸಂಗತಿಗೆ ಕಾರಣವಾಗದಿರು....

ಉಪ್ಪಲ್ಲಿ ಹಾಕಿದ ನೆಲ್ಲಿಕಾಯಿ ತಾರೆ...

                                               

ಪ್ರೀತಿಯ ಗೆಳತಿ,

                      ನಾನು ಇವತ್ತು ನನ್ನ ಕಾಲೇಜಿನಲ್ಲಿ  ತರಗತಿಗೆ ಹೋಗಬೇಕೆಂದು ಹೊರಟಿದ್ದೆ. ಆದರೆ ಯಾವುದೋ ಕಾರ್ಯಕ್ರಮದ ನಿಮ್ಮಿತ್ತ ತರಗತಿ ನಡೆಯುವದಿಲ್ಲವೆಂದು ತಿಳಿದು  ಹಿಂದಿರುಗಿ ಬರುತಲಿದ್ದೆ.  ತಟಕ್ಕನೆ ನನ್ನನ್ನು ಒಂದು ಸುವಾಸನೆ ಸೆಳೆಯಿತು ಕಣೆ! ತಿಳಿಯಬೇಡ"ಯಾವುದೊ ಪರಿಮಳ ದ್ರವ್ಯವೆಂದು ". ' ಉಪ್ಪಲ್ಲಿ ಹಾಕಿದ ನೆಲ್ಲಿಕಾಯಿ ವಾಸನೆಯೇ ಅದು!' ಅದೆಕೆನೋ ಒಂದರೆಘಳಿಗೆ ಅಲ್ಲೇ ಸ್ತಬ್ಧ .

                ಗೆಳತಿ, ಇದಕ್ಕೆಲ್ಲ ಕಾರಣ ನೀನೆ! ಬಿಡೆ ಇಲ್ಲದೆಯೇ ಹೇಳುವೆನು.. ಹಂ... ಅದೇನು ರುಚಿಯಿತ್ತೆ ನಿಮ್ಮ ಮನೆಯಿಂದ ತರುತ್ತಿದ್ದ ಆ ನೆಲ್ಲಿಕಾಯಿಗಳು. ಉಪ್ಪಿನ ನೀರಿಗೆ ಸೂಜಿ ಮೆಣಸು, ಇಂಗು.. ಜಪ್ಪಿ  ಭರಣಿಯಲ್ಲಿ ಹಾಕಿ, ಒಂದು ವಾರದ ನಂತರ ತರುತ್ತಿದ್ದೆಯಲ್ಲ.... ನಿನ್ನ ಪಾಟಿಚೀಲ ನನ್ನ ಬಳಿ ಇಟ್ಟಾಗಲೇ ನಾನು ಅರ್ಥಮಾಡಿಕೊಳ್ಳುತ್ತಿದ್ದೆ, ಅದ್ರಲ್ಲಿ ನನಗೆ ಬೇಕಾದಸ್ಟು ನಾನು ತೆಗೆಯಬಹುದೆಂದು....  ಜತೆಯಲ್ಲಿ ನಾಳೇನು ತರ್ತೇನೆ  ಎಂಬ ಭರವಸೆ...

ನೆಲ್ಲಿಕಾಯಿ ದಿನಗಳಲ್ಲಿ ನಮ್ಮ ಹೊಟ್ಟೆಯಲ್ಲಿ ಬರಿ ... ಅದೇ! ಅದಕ್ಕೇನೆ ಇರಬೇಕು ನಾವು ಅಸ್ಟೊಂದು ಚುರುಕು<!>

ಮನೆಗೆ ಬರುವಸ್ಟರಲ್ಲಿ ಪಾಟಿಚೀಲದಲ್ಲಿ  ಬೀಜಗಳೇ  ತುಂಬಿರುತ್ತಿತ್ತು. ಬಾಯಿ ನೋಡಿದರೆ ಇವರಿಗೆ ಯಾವಾಗಲೂ ಹಲ್ಲು ನೋವೇನೋ ಅನ್ನುವ ಹಾಗೆ ಒಂದು ಕಡೆ ನೆಲ್ಲಿಕಾಯಿ ಯನ್ನು ತುಂಬಿ ಉಬ್ಬಿರುತ್ತಿತ್ತು.  ಆ ದಿನಗಳು ಮುಗಿಯಿತೆಂದರೆ ನೆಲ್ಲಿಕಾಯಿಯ ಉಳಿದ ಉತ್ಪನ್ನಗಳು ನಮ್ಮಲ್ಲಿ ಸಿದ್ಧವಾಗಿರುತ್ತಿತ್ತು. !

ನೆಲ್ಲಿ ಕಾಯಿ ಚಿಟ್ಟು ....

ಬಾಯಲ್ಲಿ ನೀರು ಬಂತೆ ಇವತ್ತು...ಹೀಗೆ ಒಂದು ದಿನ ನೆನಪಾದಾಗ ಗಾಂಧೀ ಬಜಾರ್ ಗೆ ಹೋಗಿ ೧ ಕೆ.ಜಿ  ತಗೊಂಡು ಬಂದು ಜಾಮ್ ಮಾಡಿ ಇಟ್ಟಿದ್ದೇನೆ. ಆದರೆ ಆ ಉಪ್ಪಲ್ಲಿ ಹಾಕಿದ ನೆಲ್ಲಿಕಾಯಿಗಳಿಗೆ ಇದು ಒಂಚೂರು ಸಮ ಅಲ್ಲಾ ಮಾರಾಯ್ತಿ.

             ನೆಲ್ಲಿ ಕಾಯಿ ಹಾಕಿದ ಮೇಲೆ ಅದ್ರ ಮೇಲೆ ಹದಿ ಬಂದರೆ ನೆಲ್ಲಿ ಬಹಳ ರು,,,,ಚಿ... ಆಗ್ತು ಎನ್ನುವ ನಿನ್ನ ಮಾತುಗಳು ನನ್ನಲ್ಲಿ ಇವತ್ತಿಗೂ ಇದೆ... ಏನು ಮಾಡಲಿ ನೆಲ್ಲಿಕಾಯಿಗಳೇ ಇಲ್ಲ!

 ಬಾಯಲ್ಲಿ ರುಚಿಯಿದೆ ಬೀಜಗಳೇ ಇಲ್ಲ! ಇದಕ್ಕೆಲ್ಲ ನೀನೆ ಕಾರಣ ... ಹಾಂ...ಮೊದಲು ಮದುವೆಯಾಗಿ ಹೋಗಿದ್ದು ನೀನೆ!... ಒಂದು ಕಾರಣ... ತಿರುಗಿ ಮಾತಾಡಬೇಡ...'ಉನ್ನತ ವ್ಯಾಸಂಗಕ್ಕಾಗಿ ಹೋಗಿದ್ದು ನೀನು ಅಂತ ' . ಭಾವನ ಹತ್ತಿರ ಹೇಳಿ ಎಳೆದುಕೊಂಡು ಬರುತ್ತೇನೆ ...ಒಟ್ನಲ್ಲಿ ಉಪ್ಪಲ್ಲಿ ಹಾಕಿದ ಆ ನೆಲ್ಲಿಕಾಯಿ ಕೊಡು...

ನೆನಪಿದೆಯೇ ಸುಬ್ಬಿ, ಪಾಟೀ ಚೀಲದಲ್ಲಿ ಇಟ್ಟ ಎಲ್ಲಾ ವಸ್ತುಗಳೂ ನೆಲ್ಲಿಕಾಯಿ ವಾಸನೆಯೇ! ಕಡ್ಡಿ  ಬರೆಯದೆ ಇರುವದಕ್ಕು ಇದೆ ಕಾರಣ!

ಹೇ...ಟೀಚರ್ ಬೋರ್ಡಿನ ಕಡೆಗೆ ತಿರುಗುವದನ್ನು ಕಾದು...ಪಟಕ್ಕನೆ ನೆಲ್ಲಿ ಕಾಯಿ ಕೆರೆದು ಸವಿದ ಘಳಿಗೆ ನಮ್ಮದೇನೆ ....

ಮುಂದಿನ ಸಲ ಊರಿಗೆ ಬಂದಾಗ ಉಪ್ಪಿನ ನೆಲ್ಲಿಕಾಯಿ ಕೊಡದೆ ಹೋದರೆ ನಿನ್ನ ಮನೆಗೆ ಧಾಳಿ ಇಡುವೆ... ಪ್ರೀತಿಯಿಂದ...

                             ಸ್ನೇಹಿತೆ.

                               ಚಂದ್ರಿಕಾ ಹೆಗಡೆ

ಜನ್ನನ "ಯಶೋಧರ ಚರಿತೆ "ಯಲ್ಲಿ ಇಷ್ಟವಾದ ಕೆಲವು ಮಾತುಗಳು

    " ಬೇವಂ ಮೆಚ್ಚಿದ ಕಾಗೆಗೆ ಮಾವಿಳಿದಪ್ಪಂತೆ"

ಬೇವನ್ನು ಮೆಚ್ಚಿದ ಕಾಗೆಗೆ ಮಾವು ಮೆಚ್ಚಿಗೆಯಾದೀತೆ ?

"ಪರಮೆ ಪಗಲ್ ಮುಗಿಯೇ ಸಿಲ್ಕಿ ಕೈರವದಿನಿರುಳ್ ಪೊರಮಡುವಂತೆ"

ನೈದಿಲೆಯೊಳಗೆ ಸಿಕ್ಕಿ ಬಿದ್ದ ಹೆಣ್ಣು ದುಂಬಿ , ಹಗಲು ಕಳೆದಾಗ ಅದರೊಳಗಿಂದ ಹೊರಹೋಗುವಂತೆ ....

"ಈಗಳೋ ಮೇಣ್ ಆಗಳೋ ಮೇಣ್ 

ಸಾಗುದುರೆಗೆ ಪುಲ್ಲನಡಕಿ  ಕೆಡುವನೆ ಚದುರಂ "

ಬುದ್ಧಿವಂಥನಾದವನು ಈಗಲೋ ಆಗಲೋ ಇನ್ನಷ್ಟು ಹೊತ್ತಿನಲ್ಲೋ ಸಾಯುವ ಕುದುರೆಗೆ ಹುಲ್ಲು ಹಾಕಿ ಹಾಳಾಗುತ್ತಾನೆಯೇ?

"ಮೇಗಂ ಬಗೆವೊಡೆ ವಧೆ ಹಿತಮಾಗದು" 

ಮೇಲ್ಮೈಯನ್ನು ಬಯಸುವದಾದರೆ , ಕೊಲೆ ಮನುಷ್ಯನಿಗೆ ಹಿತವನ್ನು ಉಂಟುಮಾಡುವದಿಲ್ಲ.

" ಕಣ್ಣರಿಯದೊಡಮ್   ಕರುಳರಿಯದೆ ?"

ಕಣ್ಣು ಅರಿಯದಿದ್ದರು ಕರುಳರಿಯದೆ .....

".... ಕೋಣನ ಪೋರ್ಕುಳಿ ಗಿಡುವಿಗೆ ಮಿತ್ತು "

ಕೋಣನ ಕದನ ಕುತೂಹಲ ಗಿಡಕ್ಕೆ ಮೃತ್ಯು 

"ಪೊಲ್ಲಮೆಯೇ  ಲೇಸು ನಲ್ಲರ  ಮೈಯೋಳ್"

ನಮ್ಮ ಮೆಚ್ಚಿನವರ ಮೈಯಲ್ಲಿ ದೋಷವಿದ್ದರೆ ಅದೇ ಅವರ ಮೇಲ್ಮೈ ಎನಿಸುತ್ತದೆ .

"ತರಿದೊಡೆ ಕಡಿದೊಡೆ  ಸೀಳ್ ದೊಡೆ 

ಪೊರಮಡುವಂತೆ ಕಿಚ್ಚು ಕಾಷ್ಠ ದಿಂ ಪೊಸೆಯಲೋಡಮ್

ಪೊರಮಡುವದಂತೆ "

ಕಟ್ಟಿಗೆಯನ್ನು ಕೊಚ್ಚಿದರೆ, ಸೀಳಿದರೆ ಹೇಗೆ ಮಾಡಿದರೂ ಅದರಿಂದ ಬೆಂಕಿ ಹೊರಡುವದಿಲ್ಲ. ಅದನ್ನು ತಿಕ್ಕಿದಾಗ ಮಾತ್ರ ಅದರಿಂದ ಅಗ್ನಿ ಉದ್ಭವಿಸುತ್ತದೆ. 

                         ಅಕ್ಷರಗಳು  ಯಾಕೋ ಸರಿಯಾಗಿ ಮೂಡುತ್ತಿಲ್ಲ. 

                              ಓದಿನಲ್ಲಿ...

                            ಚಂದ್ರಿಕಾ ಹೆಗಡೆ

ಸಂಬಂಧ ದೂರವಾಗುವದೇ ? ದೂರ ಮಾಡುತ್ತೇವೆಯೇ!

ಚಿಕ್ಕವರಿದ್ದಾಗ ಆತ್ಮೀಯ ಸ್ನೇಹಿತ/ ಸ್ನೇಹಿತೆ ಯರಿಗೆ ಇನ್ನೊಬ್ಬರೂ ಆತ್ಮೀಯರಾಗುತ್ತಿದ್ದರೆ    ಅಂದ್ರೆ ಎನೋ ಒಂಥರಾ ಸಿಟ್ಟೂ.. ಹೊಟ್ಟೆಕಿಚ್ಚೋ...ಆಗುತ್ತಿರುವದನ್ನು ಗಮನಿಸಿಕೊಂಡಿದ್ದೆ. ಎಲ್ಲೋ ನಮ್ಮಿಂದ ದೂರವಾಗಬಹುದು ಅಂಥಾ. ಆಗ ಈ ಪರಿಸ್ಥಿತಿ  ಎಷ್ಟು   ಗಂಭೀರವಾಗುತ್ತಿತ್ತೆಂದರೆ  ದೂರವಾಗುತ್ತೆವೆನೊ ಎಂಬ ಆತಂಕದಿಂದಲೇ  ನಾವೇ ದೂರವಾಗುವಸ್ಟು...

ದಿನಗಳೆದಂತೆ  ಅರ್ಥವಾಗತೊಡಗಿತು ....

ಮುಂದಿನ ದಿನಗಳು ಎಲ್ಲ ಸ್ನೇಹತ್ವ ಮಯ!

ಜೀವನದ ಹೊಸ ತಿರುವುಗಳಲ್ಲಿ ಮನುಷ್ಯ ಬದಲಾಗದಿದ್ದರೂ ಜವಾಬ್ದಾರಿ-ಕೆಲಸ-ಜಂಜಡಗಳ ನಡುವೆ ನಮ್ಮನ್ನು ಎಷ್ಟು ಆಳಕ್ಕೆ ಇಳಿಸುವದೆಂದರೆ ಅನೇಕ  ವರ್ಷಗಳು ವರೆವಿಗೂ  ಸುತ್ತಣ ಪ್ರಪಂಚದ ಅರಿವೇ ಇಲ್ಲ ಅನ್ನುವಷ್ಟರ ಮಟ್ಟಿಗೆ!

ಪಕ್ಕದ ಮನೆಯ ಮಕ್ಕಳು...ನಮ್ಮೆದುರಿಗೆ ಅ , ಆ ,,, a b c  ಕಲಿತು...ಉತ್ತಮ ವಿದ್ಯಾಭ್ಯಾಸ ಪಡೆದು ಒಳ್ಳೆ ನೌಕರಿ ಯಲ್ಲಿ ಇರುತ್ತಾರೆ . ನಾವು ಹೊರಗಿನಿಂದಲೇ" ನೋಡು ಅವನಿಗೆ/ಳಿಗೆ  ಎಂಥಾ ಸೊಕ್ಕು.... ಮೊದಲು ಕಾಲ್ ಮಾಡ್ತಿದ್ದ ಈಗ ನೋಡು" ಎಂದು ಜರಿಯುತ್ತೇವೆ.. ತನ್ನ ಕೆಲಸದಲ್ಲಿ ಏನೋ ಮಹತ್ವಾಕಾಂಕ್ಷೆಯಿಂದಾ ಆತ ತೊಡಗಿರುತ್ತಾನೆ! ಕಂಡರೆ ಮಾತನಾಡಿಸಿ ವಿಚಾರಿಸುವ ಸೌಜನ್ಯ ಅವನಲ್ಲಿದೆ . ಆದರೆ ನಿರೀಕ್ಷೆ ಹೆಚ್ಚಿನದು!

ಇನ್ನು ಎಲ್ಲರ ಜೀವನದಲ್ಲಿ ಸಾಮಾನ್ಯವಾದ ಪಾಡು !

ಮದುವೆಯಾದ ದಂಪತಿಗಳ ಪಾಡಂತೂ  ಅದರಲ್ಲೂ ಗಂಡಿನ ಪರಿಸ್ಥಿತಿ ದೇವರಿಗೆ ಪ್ರೀತಿ! " ನೋಡು ಅಣ್ಣ  ಅತ್ತಿಗೆಯ ಹಿಂದೆ ಹಿಂದ್  ಹ್ಯಾಗೆ ಹೋಗ್ತಾನೆ" ಅನ್ನೋ ಧ್ವನಿಗಳನ್ನು ಕೇಳಿಸಿಕೊಳಬೇಡಿ  ಸ್ವಾಮೀ... ತಾವು ತಮ್ಮ ಗಂಡಂದಿರ ಬೆನ್ನಟ್ಟಿಕೊಂಡು ಹೋಗುವದನ್ನು ಮರೆತಿರುತ್ತಾರೆ! 

ಹೌದು ಪಾಪ ಮದುವೆಯಾದ ಹೊಸತು. ತೀರಾ ಹೊಸ ಜೀವನ. ಭಾವನೆ ಪ್ರೀತಿಯ ಸಮ್ಮೋಹನ ಇರಬಹುದು. ಮೊದಲು ಕೈಗೊಂಡಾ ಹಾಗೆ ಬಸ್ ಟಿಕೆಟ್ ಮಾಡುವದಕ್ಕೋ... ಬಸ್ ಹತ್ತಿಸುವದಕ್ಕೋ... ಹೋಟೆಲ್ಗೂ... ಕೆಲವೊಮ್ಮೆ ಆಗದೆ ಹೋಗಬಹುದು...  ನೀವು ಕಲಿಯುವದು ಯಾವಾಗ? 

ಹೀಗೆಂದ ಮಾತ್ರಕ್ಕೆ  ಸಹೋದರಿಯರನ್ನು ಮರೆಯುವದು ಅಂತಲ್ಲ... ಅವರಿಗೂ ತಮ್ಮ ಹಾಗೆ ಇನ್ನೊದು ಹೆಣ್ಣು ಇಲ್ಲಿ ಬಂದಿದೆಯಲ್ಲಾ ಜೀವಿಸುವದಕ್ಕೆ ಅಂಥಾ ಒಂದು ಪ್ರಜ್ಞೆ ಇರಬೇಕು! 

ಇದಕ್ಕೆ ಇರಬೇಕು  ಬಹಳ ಧಾರಾವಾಹಿಗಳು ಈ concept  ಇಟ್ಟು ಬಂದಿರುವದು!

ತಮ್ಮನ , ಅಣ್ಣನ ಹೆಂಡತಿ ಬಂದಿದ್ದಾಳೆಂದರೆ ತಂಗಿಯರನ್ನು ಅಕ್ಕಂದಿರನ್ನು  ದೂರ ಮಾಡುವದಕ್ಕಲ್ಲ,  ಹಲೋ... ನೀವು ಬೇರೊಬ್ಬರ ಮನೆಗೆ ಕಾಲಿಡುವಾಗ ಇದೆ ವಿಷ ತುಂಬಿ ಹೋಗಬೇಡಿ ... ಹೋಗಿದ್ದರು  ಈ ವಿಷ ಹರಡಬೇಡಿ!

               ಅಣ್ಣ / ತಮ್ಮ ದೂರವಾದರೆ ? ನಿಮ್ಮಿಂದ ಈ ಕೆಲಸವೇ? 

               ಹೀಗೊಂದು  ಸಾಮಾನ್ಯ ಚಿಂತನೆ!

                  ಸಹೋದರತ್ವದ ಸದ್ಭಾವದಲ್ಲಿ....

                      ಚಂದ್ರಿಕಾ ಹೆಗಡೆ

ಬೆನ್ಹತ್ತಿ ಬರುವ ಸಂಗತಿಗಳು....2

ನನಗೆ ನಮ್ಮೂರೇ ಚೆಂದ. ಆ ವಾತಾವರಣದ ಮುದ-ಹದ , ಪದಗಳಲ್ಲಿ ಹಿಡಿದಿಡಲು ಅಸಾಧ್ಯ. ನೀವು ಗಿಜಿಗುಟ್ಟುವ ನಗರದವರೆ? ನಿಮಗೆಲ್ಲಿ ಅರ್ಥವಾಗಬೇಕಿದೆ ಇದೆಲ್ಲ? " ರಜದಲ್ಲಾದರೂ ಹಳ್ಳಿಯ ಮಜಾ ಪಡೆಯಿರಿ" ಎಂಬ ಫಲಕ ನಿಲ್ಲಿಸಲೇ? ನನಗಿಷ್ಟವಿಲ್ಲ ಅದೆಲ್ಲ! ನೀವು ನಮ್ಮೂರಿಗೆ ಬರುವಾಗ ನಿಮ್ಮೊಟ್ಟಿಗೆ ತರುವ ಪ್ಲಾಸ್ಟಿಕ್ ..  ರೆಡಿ ಟು eat ..... ಅದರ  ಉಳಿದ ಬಳಿದ .... ಕಸಗಳು.... ನಾವೆಲ್ಲಿಡಬೇಕು. ನಿಮ್ಮಲ್ಲಿರೋ ಹಾಗೆ  ನಮ್ಮೂರಲ್ಲಿ ಕಸದ ತೊಟ್ಟಿ ಇಲ್ಲ... ನಾವು ಇಂಥಹ ಕಸಗಳನ್ನು  ಸೃಷ್ಟಿಸುವದೆ  ಇಲ್ಲ.  ಅಂದ ಹಾಗೆ , ನೀವು ತರಕಾರಿ , ಎಲೆ , ಸೊಪ್ಪುಗಳನ್ನು " waste " ಎಂಬ ಫಲಕದ ಕೆಳಗೆ ಬಿಸ್ಸಾಕುತ್ತೀರಂತೆ!  ಕೇಳಿದ್ದು ನಾನು ಬೇಸರಿಸಬೇಡಿ ಹಾ.... ನಿಮಗೇನು ತಿಳಿದಿದೆ ನಮ್ಮ ಎಮ್ಮೆ ,ಆಕಳು ... ಇವುಗಳಿಗೆಲ್ಲ ಅವೆಂದರೆ ಪಂಚ ಪ್ರಾಣ! ..... ಊಊಉಯ್  ಆಕಳು ಎಮ್ಮೆ , ಎಂದ ಕೂಡಲೆ ಸೆಗಣಿ ವಾಸನೆ ಎಂದು ಮೂಗನ್ನೇಕೇ  ಮುಚ್ಚಿಕೊಂಡಿರಿ ? ನಮ್ಮ ಮನೆಯ ನೆಲವನ್ನು  ಅದರಿಂದಲೇ ಸ್ವಚ್ಚಗೊಳಿಸುವದು. ಆ ನೆಲದ ಮೇಲೆ ಕುಳಿತು ಒಂದು ಇಷ್ಟವಾದ ಹಾಡನ್ನು ಗುಂಗುನಿಸುವ ಅವಕಾಶ ನಿಮಗೆಲ್ಲಿದೆ? ನೀವು ಮೋಸಾಯ್ಯಿಕ್ ನೆಲದ ಮೇಲೆ ನಡೆದಾದ ಹೋಗಿ ಜಾರಿರುತ್ತೀರಿ.!

                  ಏನೋ... ಕೇಳಿದ ಹಾಗಿತ್ತಲ್ಲ ... ಅಲ್ಲೆಲ್ಲೋ ನೀರಿನ ಆಟವನ್ನು ನೋಡುತ್ತಿರಂತೆ?  ಪ್ಲಾಸ್ಟಿಕ್ ಬಂಡೆಗಳ ಮೇಲೆ ವಿದ್ಯುತ್ ಸಂಪರ್ಕದಿಂದ ನೀರು ಬೀಳುವದನ್ನು ... ನಿಮ್ಮ taste ಗೂ ನಿಮ್ಮ ಕಣ್ಣಿಗೂ ನಮಸ್ಕಾರ.. ಅದೇನು.. ಹಸಿರು ಕೆಂಪು ಪ್ಲಾಸ್ಟಿಕ್ ಹಾಳೆಗಳ ಮೇಲೆ  ಜಾರುತ್ತ  ಮಜಾ ಅನುಭವಿಸುತ್ತಿರೀ?  ಹೇ... ನಿಮ್ಮ ... ನಮ್ಮೂರಿನ ನದಿ ಹಳ್ಳ, ತೊರೆ,, ಝರಿ ...ನೋಡ ಬೇಕೂ ..... ಅಡಿಕೆ ಹಾಳೆಗಳ ಮೇಲೆ ಕುಳಿತು ಇಳಿಜಾರಿನಲ್ಲಿ ಜಾರುತ್ತ ಹೋಗಲೂ ಧೈರ್ಯ  ಬೇಕು. ಪುನರ್ಪುಳಿ ಎಲೆಗಳ ನಡುವೆ ಒಂಚೂರೂ ಉಪ್ಪು ಇಟ್ಟು ಸವಿಯಲು ಆ ಬಾಲ್ಯವೇ ಬರಬೇಕು. ಹಸಿ ತೆಂಗಿನ ಗರಿಯಲ್ಲಿ  " watch " ಮಾಡಿ ಕೊಡಲೂ ಅಂದಿನ ಸ್ನೇಹಿತರೇ ಬರಬೇಕು...

                                                                                 ನಮ್ಮುರಲ್ಲನ್ತೂ ಮಾತಿಲ್ಲ!  ಅದೇನೂ ಮಾತಿಲ್ಲದ ಊರು ಅದ್ಯಾವ ಊರು ? ವಿಚಿತ್ರಪಾ ಅಂತ ಹೇಳಿ ... ಭಯ ಬೀಳಬೇಡಿ.... . ಅಂದ್ರೆ ನಮ್ಮೂರಲ್ಲಿ ನೀವು ಈಗ ಮಾತಾಡ್ತಾ ಇದ್ದಿರಲ್ಲ ... ಕಿವಿ ಹತ್ರ ಅದೇನೋ ವಸ್ತು ಇಟ್ಟು < ಮೊಬೈಲ್ ಅಂತೆ> ,,, ಸುಮ್ಮ ಸುಮ್ಮನೆ  ನಗ್ತಾ , ನಾಚಿಕೊಳ್ತಾ, ಕೈ, ಬಾಯಿ , ಮಾಡ್ತಾ ಇರೋದು, ಇವೆಲ್ಲ ನಮ್ಮೂರಲ್ಲಿ ಇಲ್ಲಾ... ನಾವು  ಪಕ್ಕದ ಮನೆಯವರ ಹತ್ತಿರ ಮಾತನಾಡಬೇಕು ಅಂದ್ರೆ ಹೇ,,, ಹೋ... ಓಯ್,,, ಕೂಹೂ.. ಏ, ,,,, ಇವುಗಳನ್ನೇ,, ಬಳಸೋದು.  ಏನಂದ್ರೂ ನಮ್ಮೂರಲ್ಲಿ ಏಕಾಂತ ಇದೇರಿ. ನಿಮ್ಮೂರಲ್ಲಿ ಎಷ್ಟು ದುಡ್ಡು ಕೊಟ್ರು ಇದು ಸಿಗೊದಿಲ್ಲಂತೆ !. ಈಗ ನಿಮ್ಮೂರಿಗೆ ನಾನು ವಿಚಿತ್ರ ಊರು ಅಂತ ಹೇಳಬೇಕಾಯಿತು.

                          .............. ಏನೋ ತಮ್ಮೂರನ್ನು ಹೊಗಳಿಕೊಂಡು ಇದೆಲ್ಲ ಹೇಳ್ತಾ ಇದಾಳೆ ಅಂತ ಅಸಡ್ಡೆಯಿಂದ ಕೂಡ ಬೇಡಿ. ನಮ್ಮ ಹಳ್ಳಿ ನಿಮ್ಮೂರ < ಈಗ ಯಾರನ್ನು ಕೇಳಿದ್ರು ಬೆಂಗಳೂರು .....>ಹಾಗೆ ಆಗ್ತಾ ಇದೆ ಅನ್ನೋದು ನನ್ನ ಈ  ವಿಚಾರಕ್ಕೆ ಕಾರಣ .

                         ಇನ್ನೂ... ಇದೆ...

ಚಂದ್ರಿಕಾ ಹೆಗಡೆ

ಮೋಡದ ಮರೆಯಲ್ಲಿ ಕದ್ದು ಮುಚ್ಚಿ ನೋಟ- ಆಟ!

ನಿನ್ನೆ ಮಗನ ಜೊತೆಯಲ್ಲಿ ಮನೆಯ ಮೇಲೆ  ಹೀಗೆ ಆಟವಾಡುತ್ತ ಇದ್ದೆ ... ನನ್ನ ಮಗ "  ಅಲ್ಲಿ ಚುಲ್ಯಾ" ಅಂದಾ ... ಒಮ್ಮೆ ದೃಷ್ಟಿ ಹರಿಸಿದೆ. ಒಳ್ಳೆ ಆಟ ಅಲ್ಲೂ ಇತ್ತು... handicam ತೆಗೆದುಕೊಂಡು ಬಂದೆ... ಅಲ್ಲಿಂದ ಶುರು!   

    

ತೆಗೆಯುವದೆ ತಡ!

ಅದೆಲ್ಲಿಂದಾ ಉಮೇದು ಬಂತೂ ಸೂರ್ಯಂಗೇ! 

ನೋಡಿ ಹೀಗೂ

ಚೂರಾದ ಚಪಾತಿಯ ಹಾಗೆ!

ಇದೆಂತೂ... ಸ್ಕ್ಯಾನಿಂಗ್ ನಲ್ಲಿ  ನಾನು ಮಗುವಿನ ಬೆಳವಣಿಗೆ ನೋಡಿದ ನೆನಪು ಬಂದಿತು.

ಇದಕ್ಕೇನು... ಐಸ್ಕ್ರೀಂ ಕಪ್ ನಿಂದಾ ಒಂದು ಹನಿ ಜೊತೆಯಲ್ಲಿ ಅದರ ಬಣ್ಣ ಸೇರಿಸಿಯೇ ಬಿದ್ದ ಹಾಗೆ!

ಮೀನಿನ ಹಾಗೆ! ಯಾವುದೋ ದೃಷ್ಟಿ!

ನಾನು ಇದ್ದೇನೆ!

ಮತ್ತೆ! ಎಲ್ಲಿ?

ಇಷ್ಟು ಹೊತ್ತಿಗೆ ಇವನ ಆಟ ಮುಗಿದಿರಬೇಕು ಅಂಥಾ ಲೆನ್ಸ್ ಕ್ಲೋಸ್ ಮಾಡಿ ಹೊರಟಿದ್ದೆ... ಇದನ್ನೇ ನೋಡುತ್ತಿದ್ದ ನನ್ನ ಮಗ ಮತ್ತೆ ಚುಲ್ಯಾ ಮಮ್ಮ ಅಂದಾ 

ಶುರುನಾ....

ಬಣ್ಣದ ಬೆರಗು ಆರಂಭವಾಯಿತು!

ಇದು ಒಂದು brunada ತರಹ ಕಂಡಿತು..!

.ಆಬ್ಹಾ! ಇದೆಂತದು... 

ಬೆಂಕಿಯ ಉಂಡೆ!

ಕಾನವಾಸ್ನಲ್ಲಿ ಹಾಗು ಹೀಗು ಎರಚಿದ ಬಣ್ಣಗಳೇ!

ಹೀಗೆ ವಿಚಾರಿಸುತ್ತಿರುವಾಗಲೇ  ನಾಳೆ ಬರುತ್ತೇನೆ ಎಂದಾ ಆಟಗಾರ ....

....... ಪಾಪುಗೆ ನಿನ್ನ ಚುಲ್ಯಾ ನಾಳೆ ಬತ್ತ... ಅಂದು  ಮನೆಗೆ  ಮೆಟ್ಟಿಲು ಇಳಿಯತೊಡಗಿದೆವು...

                                               ಚಿತ್ರವಿಚಿತ್ರಾ ಭಾವಗಳೂ..... ಆಕಾಶದಲ್ಲಿ....

                                               ಸಚಿತ್ರ ಸತ್ಯದ ಸಂಭ್ರಮದಲ್ಲಿ 

                                              ಚಂದ್ರಿಕಾ ಹೆಗಡೆ

ಕಾರಣ ಗೊತ್ತಿಲ್ಲ !

   ಸುಮಾರು  ೧೪-೧೫ ವರ್ಷಗಳ ಹಿಂದಿನ ಮಾತು ...

 ಪ್ರೌಢ  ಶಾಲೆಯ ದಿನಗಳ  ನೆನಪು...

ನನಗಂತೂ 'ಹುಡುಗರು' ಶತ್ರುಗಳಂತೆ ಆಗಿದ್ದರು. ಕಾರಣ? ಹುಡುಗರ ಹತ್ತಿರ ಮಾತನಾಡಲು ಒಂದಿನಿತೂ ಭಯವಿರಲಿಲ್ಲ. ಮಾತನಾಡಿದ್ದೆ ೧೦-೧೨ ಸಲ! 

ಕಾರಣ ಕೇಳಿದರೆ ಗೊತ್ತಿಲ್ಲ!

ನಾನು ಯಾವಾಗಲೂ cultural champion ಆಗಿರ್ತಾ ಇದ್ದೆ. ಅದೆಷ್ಟೂ ಮೊದಲುಗಳ ಒಡತಿಯಾಗುತ್ತಿದ್ದೆ.  ಆದರೆ ಇಂಗ್ಲಿಷ್  ಭಾಷಣ ಹಾಗು ಪ್ರಬಂಧದಲ್ಲಿ ಮಾತ್ರ ಎರಡೋ ಮೂರನೆಯದೋ ಸ್ಥಾನ!  ಅದೇನೂ ನಿನಗೆ ಎಲ್ಲ ಸಿಗಬೇಕಾ ಅಂಥಾ ಕೇಳಬೇಡಿ?  ಏಕೆಂದರೆ  ಎಲ್ಲರೂ ಒಪ್ಪಿಕೊಳ್ಳೋ ಸತ್ಯವಾಗಿತ್ತೂ... ಏನೆಂದರೆ ನನ್ನ ಅಮ್ಮ ಅಲ್ಲಿ ಇಂಗ್ಲಿಷ್ ಟೀಚರ್ ... ಏನಾದರೂ ನನಗೆ ಮೊದಲ ಸ್ಥಾನ ನೀಡಿದರೆ  ತನ್ನ ಮಗಳಿಗೆ  ತಾರತಮ್ಯ ಮಾಡಿ ಕೊಟ್ಟಳು ಎಂಬಾ ಅಪವಾದಕ್ಕೆ ಗುರಿಯಾಗಬೇಕಲ್ಲ!  ಆದ್ರೆ ನನ್ನ ಮನಸ್ಥಿತಿ ಹೇಗಿರಬಹುದು.... ಇದು ದೂರಲ್ಲ! 

ಅಬ್ಭಾ! ನನ್ನ ಉತ್ತರ ಪತ್ರಿಕೆಗಳಿಗೆ ಅದೆಷ್ಟು ಬೇಡಿಕೆ? ತೂಗಿ ಅಳೆದು ನೋಡಲು! ಎಲ್ಲಾದರೂ ಮಾರ್ಕು ಹೆಚ್ಚಿಗೆ ಹಾಕಿದ್ದರಾ ಅಂಥಾ... ಅದೇನೂ ಪರೀಕ್ಷೆಯ ಆಸಕ್ತಿ ಕಳೆದುಕೊಳ್ಳಲು ಇದೊಂದೂ ಕಾರಣನಾ?  ಯಾಕೆಂದ್ರೆ ಅಂಥಾ ಜೊತೆಗಾರರು ನನ್ನಿಂದ ದೂರವಾದ ಮೇಲೆ ನಾನು ಪರೀಕ್ಷೆಯಲ್ಲಿ ಇವತ್ತಿನವರೆವಿಗೂ ಅತ್ಯಾಸಕ್ತಿ ಹೊಂದಿರುವದು!  ಈ ಎಲ್ಲ ಕೆಲಸಗಳು ಹುಡುಗಿಯರದ್ದೇ.ಹುಡುಗರದಲ್ಲ.ಆದರು ಅವರ ಹತ್ತಿರ ಮಾತನಾಡುತ್ತಿರಲಿಲ್ಲ!

ಗಣಿತದ ವಿಷಯದಲ್ಲೂ ಅಷ್ಟೇ ... ನಾನು ಇದರಲ್ಲಿ ಸ್ವಲ್ಪ ಹಿಂದೆ... ಪ್ರಯತ್ನ ವಿಲ್ಲದ  ಹಿಂದೆ ಬೀಳುವಿಕೆ.. ಹಾಗಂತಾ ೬೦-೬೫  ಯಾವಾಗಲೂ... ನನ್ನ ಅಪ್ಪ ಗಣಿತವನ್ನು ಹೇಳಿಕೊಡುತ್ತಿದ್ದರು.. ಬೋರ್ಡ್ ನಲ್ಲಿ ಗಣಿತವನ್ನು ಬಿಡಿಸಲು ಹೇಳಿದಾಗ ನಾನು ತಲೆಕೆರೆಯುವದೆ! ಹುಡುಗರು ಹಿಂದಿನಿಂದಲೇ  ಹೇಳಿಕೊಡುತ್ತಿದ್ದರು.. ಗ್ರಹಿಸಿ ನಾನು ಬಿಡಿಸುತ್ತಿದ್ದೆ ಇದು ಇಂದಿಗೂ ನನ್ನ ಅಪ್ಪನಿಗೆ ನಂಬಲಾರದ ಸತ್ಯ!ಆದರೂ ಅದೇಕೆ ಅಸ್ಟು ದ್ವೇಷ  ಕಾರಣ ಗೊತ್ತಿಲ್ಲ. 

ಮಾತನಾಡುತ್ತೇನೆ.. ಈಗ ಸಿಕ್ಕಾಗಲೆಲ್ಲ. ಕೆಲವೊಬ್ಬರು ಇಂದಿಗೂ ಆಶ್ಚರ್ಯ ಪಡುತ್ತಾರೆ. ಇವಳು  ಅದ್ಹೇಗೆ ಬದಲಾದಳೆಂದು? ಇನ್ನು ಕೆಲವರು ಸಿಗಬೇಕು... ನಾನು ಅವರ ಹತ್ತಿರಾ ಹರಟಬೇಕು... ಅವರ ತಲೆಯಲ್ಲಿ ಹುಳ ಬಿಡಬೇಕು... 

ಮಾತನಾಡಿಸುತ್ತೇನೆ ನನ್ನ ಮೇಲೆ ಯಾವ ಕೆಟ್ಟದೃಷ್ಟಿಯಿಂದಲೂ ನೋಡದ  ಆ ಹುಡುಗರನ್ನು!

                                ಕಾರಣದ ಹುಡುಕಾಟ ಬಿಟ್ಟು...

                                ಚಂದ್ರಿಕಾ ಹೆಗಡೆ

ನಗು !

ಕೆಲವೊಬ್ಬರಿರುತ್ತಾರೆ- ಗಂಭೀರ ಮುಖಭಾವ, ಅಲ್ಲಲ್ಲಿ ಕಿಂಚ್ಚಿತ್ತಾದರೂ ನಗು! ದೇವರಾಣೆಗೂ ದೊರೆಯುವದಿಲ್ಲ. ಹಲ್ಲು ಬೆಳ್ಳಗಿದೆಯೇ ಇಲ್ಲಾ ಇವತ್ತೇ ದಂತ ಚಿಕಿತ್ಸಾಲಯಕ್ಕೆ ಹೋಗುವ ಅನಿವಾರ್ಯತೆ ಇದೆಯೇ! ಉಹುಉಂ ತಿಳಿಯುವದೇ ಇಲ್ಲ. ಅಷ್ಟು ಬಿಗಿ ಬಂದೋಬಸ್ತ್. ಅವರ ಹತ್ತಿರ ಕೋಟಿಗಟ್ಟಲೆ ಹಣ ಕೊಳೆಯುತ್ತಿದ್ದರೂ ನಗುಸುವಾಸನೆ ಹತ್ತಿರವೂ ಸುಳಿಯುವದಿಲ್ಲ. ಗಂಭೀರವೋ , ಭಯವೋ , ಅಥವಾ ಹಿಂಜರಿಕೆಯೋ... ಒಟ್ಟಿನಲ್ಲಿ ನಮ್ಮಂಥಹವರು ಅವರಿಗೊಂದು ಹೆಸರು"ಸುಡು ಸುಡು ಮುಖದವನು... ಒಂದು ಚೂರು  ನಗು ಹುಟ್ಟೋದಿಲ್ಲ, ಒಣ ಮುಖ" ಎನ್ನುತ್ತೇವೆ.

ಬಹಳಷ್ಟು  ಜನರಿರುತ್ತಾರೆ_ ನಗು ಮುಖ, ಹಲ್ಲು ಬೆಳ್ಳಗಿರಲಿ, ಅಥವಾ ಹಿಂದಿನ ವರ್ಷವೇ  ದಂತ ವೈದ್ಯರ ಹತ್ತಿರ ಹೋಗಬೇಕಿತ್ತು ಎಂಬ  ಅನಿವಾರ್ಯತೆ ಇದ್ದರೂ ಮುಖದಲ್ಲಿ ಒಂದಷ್ಟು ನಗು ಚಿಮ್ಮಿಸುತ್ತಾರೆ... ಪರಿಚಯದ ನಗು, ಮಂದಹಾಸ, ಇವರನ್ನು ನೋಡಿದರೆ ಇನ್ನಷ್ಟು ಮಾತನಾಡಬೇಕೆಂಬ ಬಯಕೆ... ಏನೋ ಆತ್ಮೀಯತೆ-ಸಲುಗೆ, ಭಾವನೆಯ ಹಂಚುವಿಕೆ, ಭಾವುಕತೆಯ ಕ್ಷಣ .... ಹೀಗೆ ಸ್ನೇಹತ್ವದ ಗುರುತು. ಇಂತಹವರ ಹತ್ತಿರ ಏನೇನೂ ಹಿಂಜರಿಕೆಯಿಲ್ಲ. ನಗುವ - ದುಃಖ ಶಮನಗೊಳಿಸುವ  ಮನಸು ಇವರದು.

ಗಂಭೀರ ವದನದ ಹೆಸರನ್ನು ಹೊತ್ತ ಕೆಲವರು.... ಸೂಕ್ಶ್ಮವಾಗಿ ಇನ್ನೊಬ್ಬರನ್ನು ಗಮನಿಸುತ್ತಾ ಅವರ ಹಿಂದಿನಿಂದ  ಆಡಿಕೊಳ್ಳುತ್ತಾರೆ. ಬೇಕಾದಲ್ಲಿ ಇಡಬೇಕಾದ"ಚುಚ್ಚುಗಳನ್ನು "ಆಳವಾಗಿಯೇ ನೆಟ್ಟಿರುತ್ತಾರೆ. ಬಿಚ್ಚುಮನಸಿಗರಲ್ಲದ ಇವರು ವಿಚಿತ್ರ.! ಹೀಗೆ ನಮ್ಮ ಪರಿಚಯದ ಒಬ್ಬ ಹೆಣ್ಣುಮಗಳು ಹೆಚ್ಚು  ಮಾತಾಡುವದಿಲ್ಲ. ಮುಖ ನಿರ್ಲಿಪ್ತವೋ , ಗಂಭೀರವೋ... ನಾ ಅಂದುಕೊಂಡಿದ್ದೆ ಅವಳ ಸ್ವಭಾವವೇ ಹೀಗೆ _ಅಷ್ಟು ಮಾತನಾಡುವದು ಇಷ್ಟವಾಗುವದಿಲ್ಲವೋ  ಏನೋ ಎಂದು.<  ಏಕೆಂದರೆ ನನ್ನ ಬಳಿ ಅವಳ ವರ್ತನೆ ಹೀಗೆ ಇತ್ತು. ನಾನು ಅವಳಿಗಿಷ್ಟವಿಲ್ಲವೆಂದು ಮುಂದೆ ಅವಳು ಸಿಕ್ಕಾಗೆಲ್ಲಾ ಹಾಯ್ ಎಂದು ಸುಮ್ಮನಿರುತ್ತಿದ್ದೆ. ಆಮೇಲೆ ಗೊತ್ತಾಯಿತು ಅವಳ ಸ್ವಭಾವ... ನನ್ನ ಬಗ್ಗೆ ಇಲ್ಲ ಸಲ್ಲದನ್ನು ಹೇಳಿ ಹೇಳಿ.... > ಸ್ವಾಮೀ ಅವಳು ಸುಮ್ಮನಿರುತ್ತಾಳೆ ಎಂಬುದು ಶುದ್ಧ ಸುಳ್ಳು. ಅವಳು ಒಮ್ಮೆ ಅವಳ ಸಂಬಂಧಿಕರಿಗೆ  <!> ಫೋನಾಯಿಸುವದನ್ನು ನಾನು ಗಮನಿಸಿದ್ದೆ. ಅದೆಷ್ಟು ಮಮಕಾರ, ಆತ್ಮೀಯ ಬೆಸುಗೆ, ನಗು-ಹಿತೈಷಿ.... ಅಂದಿನಿಂದ ಅವಳ ಬಗೆಗೆ ಕಾಲ ಹೇಳಬೇಕು ಎಂದುಸುರುತ್ತೇನೆ!

ಇನ್ನೂ ಕೆಲವರು ನಗುತ್ತಾರೆ, ಹಿಂದಿನಿಂದ ಬೇರೇನೋ ಆಡಿಕೊಳ್ಳುವರು. ಇವರಿಗೆ ದಂತ ಚಿಕಿತ್ಸೆಯ ಅವಶ್ಯಕತೆಯೇ ಇಲ್ಲ. ! ಅಯ್ಯೋ ಇಂಥವರನ್ನುಸುಖಾಸುಮ್ಮನೆ ಅವಲಂಬಿಸಬೇಡಿ. ನಿಮ್ಮ ಹತ್ತಿರ "use and throw    " ತರಹ ವರ್ತಿಸಬಹುದು. ಕೆಲಸವಾಗುವವರೆಗೆ ಮಾಡಿಸಿಕೊಂಡು<ಪುಗಸಟ್ಟೆ> ನಂತರ ತಮ್ಮ  stop <ಜೀವನ!> ಬಂದಾಗ ಸದ್ದಿಲ್ಲದೇ ಮರೆಯಾಗಿ, ನಿಮ್ಮ ಕುರಿತು ಇಲ್ಲಸಲ್ಲದ ಹೇಳಿಕೆ, ವಿರೋಧಿಭಿಪ್ರಾಯಗಳ  ಫಲಕಗಳನ್ನು ಹಾಕಿಯೇ ಬಿಡುತ್ತಾರೆ! ಎಲ್ಲಿ ತಮ್ಮಿಂದ ಕೆಲಸ , ಸಹಾಯ ಕೇಳಿದರೆ?  ಸದ್ದಿಲ್ಲದೇ ಮದ್ದನ್ನು ಅರೆಯುವರು ಈ ಜನರು!

                    ಅನುಭವದ ಮೂಸೆಯಿಂದ ಹೊರಹಾಕಲ್ಪಟ್ಟಿದೆ.... 

                                                             ಚಂದ್ರಿಕಾ ಹೆಗಡೆ     

ನನ್ನ ಓದು..

                

                             ಕೈಲಾಸಂ ಅವರ "ಟೊಳ್ಳು ಗಟ್ಟಿ" 

ಕನ್ನಡ ಸಾಮಾಜಿಕ ನಾಟಕ ಪರಂಪರೆಗೆ ಭದ್ರ ಬುನಾದಿಯನ್ನು ಹಾಕಿದ ಕೀರ್ತಿ  ಕೈಲಾಸಂ  ಅವರಿಗೆ ಸಲ್ಲುತ್ತದೆ .ಸಮಕಾಲಿನ ಸಮಸ್ಯೆಗಳ ಗಂಭೀರ ಚರ್ಚೆ ಹಾಗು ಪರಿಶೋಧನೆಯನ್ನು  ಅವರ ನಾಟಕಗಳಲ್ಲಿ ಗುರುತಿಸಬಹುದು.

ಕೈಲಾಸಂ ಈ ನಾಟಕದಲ್ಲಿ ತಮ್ಮನ್ನು "ಪ್ರಹಸನ ಪಿತಾಮಹ" ಎಂದು ಕರೆದುಕೊಂಡಿದ್ದಾರೆ .ಸಮಕಾಲೀನ ಸಮಾಜದ ಅಂಕುಡೊಂಕುಗಳನ್ನು ಹಾಸ್ಯಮಯವಾಗಿ  ಚಿತ್ರಿಸಿರುವದನ್ನು ಕಾಣಬಹುದು. ಹಾಸ್ಯದ ಮೂಲಕ ಬದುಕಿನ ಗಂಭೀರ ವಿಶ್ಲೇಷಣೆಯನ್ನು ನಡೆಸುತ್ತಾರೆ. 'ಬದುಕಿನಲ್ಲಿ ಎದುರಾಗುವ ಕಣ್ಣೀರಿನ ಕಡಲನ್ನು ಹಾಸ್ಯದ ಹರಿಗೋಲಿನಿಂದ ದಾಟಬೇಕೆಂಬುದು  ಕೈಲಾಸಂರವರ ಆದರ್ಶವಾಗಿತ್ತು'

 "ಟೊಳ್ಳುಗಟ್ಟಿ" ಕೈಲಾಸಂ ಅವರ ಎಲ್ಲ ನಾಟಕಗಳ ಆಶಯವನ್ನೂ ಪ್ರತಿನಿಧಿಸುವಂಥಹ ನಾಟಕವಾಗಿದೆ. ಪಾಶ್ಚಿಮಾತ್ಯ ಪ್ರಭಾವದಿಂದ ಪುರಾತನ ಭಾರತೀಯ ಸಂಸ್ಕ್ರತಿಯನ್ನು.... ಅಲ್ಲೋಲಕಲ್ಲೋಲ ಮಾಡಿದ ಕ್ರಮ.. ಜನಜೀವನದ ವೈಪರೀತ್ಯ.. ಹೀಗೆ ಆಧುನಿಕ  ಜಗತ್ತೂ... ಆಧುನಿಕ  ಶಿಕ್ಷಣದ  ಎಲ್ಲ ಸಾಧ್ಯತೆಗಳನ್ನು ಅನಾವರಣ ಮಾಡುವ ಶೈಲಿ ಇಷ್ಟವಾಗುತ್ತದೆ.

"ಟೊಳ್ಳುಗಟ್ಟಿ"ಯ ಹಿರಿಯಣ್ಣಯ್ಯ ನ ಮಕ್ಕಳಾದ ಪುಟ್ಟು , ಮಾಧು- ಎರಡು ವೈರುಧ್ಯದ ಪಾತ್ರಗಳು!ತಂದೆಯ ಪ್ರೀತಿ ಪಾತ್ರನಾದ   ಪುಟ್ಟು.. ಓದಿನಲ್ಲಿ ಮುಂದು.ಬದುಕಿನಲ್ಲಿ ಸ್ವಾರ್ಥಿ. ಓದಿನಲ್ಲಿ ಹಿಂದೆ ಉಳಿಯುವ .. ಉಳಿದಿದ್ದ ಮಾಧು.. ಪರೋಪಕಾರಿ.

ಈ ಎರಡು ವಿಭಿನ್ನ ಪಾತ್ರಗಳ ಮೂಲಕ ಈ ನಾಟಕವನ್ನು ಹೆಣೆಯಲಾಗಿದೆ. ಪುಟ್ಟುವಿನ ಹೆಂಡತಿ ಪಾತು... ಮಾಧುವಿನ ಹೆಂಡತಿ ಸಾತು... ಅವರ ಮಾತುಕತೆಗಳು... ತುಂಬಾ ಸ್ವಾರಸ್ಯಕರವಾಗಿದೆ . ಇವರ ಮನೆಗೆ ಬೆಂಕಿ ಬೀಳುವ ಸನ್ನಿವೇಶ " ಅಗ್ನಿಪರೀಕ್ಷೆ" ಯಂತಿದೆ . ಈ ಜೀವನ ಪರೀಕ್ಷೆಯಲ್ಲಿ  ಮಾಧೂ ನಾಯಕನಂತೆ ಕಾಣಿಸುತ್ತಾನೆ!. ಮನೆಗೆ ಬೆಂಕಿ ಬಿದ್ದಿದೆಯೆಂದು ತಿಳಿದ ತತ್ ಕ್ಷಣ ರೋಗಿಯಾದ ತಾಯಿಯನ್ನು, ಹಸುಳೆಯನ್ನು  ಲೆಕ್ಕಿಸದೆ ತನ್ನ ಪುಸ್ತಕವನ್ನಷ್ಟೇ ಬಾಚಿಕೊಂಡು ಪುಟ್ಟು ಹೊರಕ್ಕೆ ಓಡುತ್ತಾನೆ. ಮಾಧು  ಮನೆಯವರನ್ನು ರಕ್ಷಿಸಲು ತನ್ನ ಜೀವದ ಹಂಗು ತೊರೆದು ಹೋರಾಡುತ್ತಾನೆ.

ಈ ನಾಟಕವನ್ನು ಓದಿದಂತೆ ಇಲ್ಲಿರುವ ಪಾತ್ರಗಳು ನಮ್ಮ ಮನೆಯಲ್ಲೋ ... ಪಕ್ಕದ ಮನೆಯಲ್ಲೋ... ಒಟ್ನಲ್ಲಿ ನಮ್ಮ ಸುತ್ತಮುತ್ತ ನಡೆಯುವ ಘಟನೆಏನೋ... ಅನ್ನುವಷ್ಟು.. ಹತ್ತಿರವೆನಿಸುತ್ತೆ.  ಕೈಲಾಸಂ ಅವರ ಭಾಷೆ..ಶೈಲಿ... ಇಷ್ಟವಾಗತ್ತೆ. " ಪಾಶ್ಚಾತ್ಯ ಪ್ರಭಾವದಿಂದ ಒಮ್ಮೊಮ್ಮೆ ಬೆಂಕಿ ಬಿದ್ದ ಮನೆಯಂತಾಗಿರುವ ನಮ್ಮ ಮನಸು... ಆಶೆ ... ಅಂತಸ್ತುಗಳು... ಸಮಾಜ... ಇವೆಲ್ಲವನ್ನೂ ಸುಸೂತ್ರವಾಗಿ ಒಳ್ಳೆದಾರಿಗೆ ಕೊಂಡೊಯ್ಯಲು ಮಾಧುವಿನಂಥಹ ಧೀರರು ಅವಶ್ಯಕ.. ಪುಟ್ಟುವಿನಂಥಹ ಪುಸ್ತಕದ ಹುಳುಗಳು ಅಲ್ಲಾ ಎಂಬುದನ್ನು ಈ ನಾಟಕ ಚೆನ್ನಾಗಿ ಧ್ವನಿಸುತ್ತದೆ.

                                                         ಇನ್ನು ಗ್ರಹಿಕೆಯ ಅಡಿಯಲ್ಲಿ  ಚಿಂತನೆ .... ನಡೆಯುತ್ತಿದೆ....

                                                            ಚಂದ್ರಿಕಾ ಹೆಗಡೆ

ಅವಳ ..... ಘಳಿಗೆಗಳು!

         


ಅತ್ತು ಕಣ್ಣೆಲ್ಲ ಇಂಗಿಹೋಗುವ ಸಮಯದಿ
ನಿನ್ನ ಆಗಮನ
ಇರುವ ಕಣ್ಣೀರೆಲ್ಲ ಆರಿಹೋದ ಮೇಲೆ
ಕಣ್ಣಿನಲ್ಲಿಲ್ಲ ನೀರು
ನಿನ್ನ ಸಡಗರವ ನೋಡಲೂ ಅಸಹಾಯಕಳು
ಕಗ್ಗತ್ತಲು ಕವಿದಿದೆ ಜೀವನ ಯಾನ!

ವಿಚ್ಚಿನ್ನ  ಮನ, ನಿನ್ನ ಸಾಂತ್ವನ ಭದ್ರ
ಬತ್ತಿಹೋದ ಕಣ್ಣಿನಲ್ಲೀಗ  ಜೀವ ಜಲಧಾರೆ
ಪ್ರೀತಿ ಅಮರ ದುಃಖ  ಕ್ಷಣಿಕ
ಸಹಬಾಳ್ವೆ ಸಮರಸ ಜೀವನ ತಂತ್ರ....
                                                      ಮನದ ದಿಟ್ಟ ಭಾವನೆಯ ಜೊತೆ ಭದ್ರ ಹೆಜ್ಜೆಯಲ್ಲಿ .........
               ಚಂದ್ರಿಕಾ ಹೆಗಡೆ

                                      

ಕಲ್ಲೂ ಮಾತಾಡಿತು

  ದೂರದ ನಾವೆಯೊಂದರಲ್ಲಿ ನೀ
ಕಾಯುತ್ತಿದ್ದೆ ಆವಾಗಿನಿಂದಲೇ
ಹುಟ್ಟು ಹಾಕಲು ಅರಿಯದೆ
ಕಂಗಾಲಾಗಿದ್ದೆ ಸಮುದ್ರ ತೀರದಲ್ಲಿ ...
ಅತ್ತಲೆಲ್ಲಿಂದಲೂ ಆಕೆಯ ಛಾಯೆ
ಬಂದಳೋ.. ಇಲ್ಲವೇ ಹೋದಳೋ...
ನಾ ಅರಿಯೆ !
ಸ್ಥಿತಪ್ರಜ್ಞನಂತೆ, ಕಾವಲಿನವನಂತೆ
ಕಾಲೂರಿ ಮರಳುಗಳಡಿಯಲ್ಲಿ ನನ್ನ ಬೇರಿತ್ತು! ಅಷ್ಟೇ....
ಭಾವ ಸಂಚಾರವಾದಂತಾಗಿ
ಇದ್ದಲ್ಲಿಯೇ ಕಣ್ಣಿಲ್ಲದ ವಿಷಯ
ಮರೆತೇ ಹೋಗುವಷ್ಟು ದರ್ಶನವಾಗಿತ್ತು.

           ನಿನ್ನಿಂದ ಆಚೆ ಹೋದ ಹುಡುಗಿ!!
ತನ್ನ ಮೊಮ್ಮಗುವಿನೊಂದಿಗೆ!
ಇದೆ ತೀರಕ್ಕೆ , ನನ್ನ ಮೇಲೆ ಕುಳಿತಳು.
ಪಕ್ಕದ "ಅಜ್ಜ" ನೀನಾ?
ನೋಡತೊಡಗಿದೆ ಅವಳ ಮುಖದ ನೆರಿಗೆಗಳನ್ನು!
ಅಡಗಿಹೋದ ನಿನ್ನನ್ನು
ನಿನ್ನಷ್ಟೇ ಎಷ್ಟೋ ಮುಗ್ಧಜನರನ್ನು!
ಸಧ್ಯ ಯೌವನವಿಲ್ಲ- ಅಷ್ಟು ಸಾಕು.....

ನನ್ನ ಮಗನ ಮೊದಲ ಹಾಡು

ಹೇಳಬೇಕೆನಿಸಿದ್ದು...
ಚಿಕ್ಕ ಮಕ್ಕಳಲ್ಲಿರುವ ಕ್ರಿಯಾತ್ಮಕತೆ  <creativity > ಯನ್ನು ನೋಡಿ ಬೆರಗಾಗುವ ಎಷ್ಟೋ ಸಂದರ್ಭಗಳು ನನ್ನ ಜೀವನದಲ್ಲಿ ಒದಗಿವೆ.  ನಾನು ಚಿಕ್ಕವಳಿದ್ದಾಗ  ಅಂದ್ರೆ ಸುಮಾರು ೭ ನೆ ತರಗತಿಯಿಂದ ಹಿಡಿದು... ಪಕ್ಕದ ಮನೆಯ ಮಕ್ಕಳನ್ನು  ನೋಡಿ ಅವರನ್ನು ತೀರಾ ಹತ್ತಿರದಿಂದ ನೋಡಿ ಹಲವು ಬೆರಗು ಮೂಡಿತ್ತು... ನಾನು ಕಲಿಸಿದ ಎಷ್ಟೋ ಹಾಡು ಅವರ ಬಾಯಲ್ಲಿ ಬೇರೇನೋ ಸಾಹಿತ್ಯದಲ್ಲಿ ಬಂದಿದ್ದನ್ನು ಕಂಡಿದ್ದೆ. ಕಲಿಸಿದ  ಹೆಜ್ಜೆ ಏನೇನೋ  ಬೇರೆ ಹೆಜ್ಜೆಗಳಲ್ಲಿ  ನರ್ತಿಸುವದನ್ನು ನೋಡಿ ಅಬ್ಭಾ ಎಂದಿದ್ದೆ... ಈಗ ಮನೆಯ ಮಗುವಿನಲ್ಲಿ ನೋಡುವ ಸಂದರ್ಭ .... ವಾಹ್... ಎನ್ನುವ ಸಮಯ... ಹೆತ್ತವರಿಗೆ ಹೆಗ್ಗಣ ಮುದ್ದು ... ಎನ್ನಿಸಿದರೂ ಸರಿ... ಹೇಳಲೇ ಬೇಕು... ನಾನು ಈ ಮೊದಲೇ ಹೇಳಿದ ಹಾಗೆ ನಾನು ಭಾವನೆಯ ಜೊತೆಯಲ್ಲಿ ಹೆಜ್ಜೆ ಹಾಕುವವಳು ....
ನಾನು ರಚಿಸಿದ ಕವನ :
ಚಂದಮಾಮ ಚಕ್ಕುಲಿಮಾಮ
ಅಲ್ಲಿ ಯಾಕೆ ಕುಳಿತಿರುವೆ ಇಲ್ಲಿಗ್ ಬಾರೋ...
ಹಣ್ಣು ಕೊಡುವೆ... ಹಾಲು ಕೊಡುವೆ
ಓಡಿ ಬಾರೋ....
ಮಗುವಿನ ಬಾಯಲ್ಲಿ:
ತಂದಮಾಮ ... ಚನುಮಾಮ
ಇಲ್ಲಿ ಅಲ್ಲಿ  ಆಕೆ...
ಹಾಲ್... ಹಣ್ಣ ಮಮ್ಮ < ಮಮ್ಮ ಕೊಡುತ್ತಾಳೆ ಅಂಥಾ >
ಕೂಉಕಾ  ಬಾಲೋ....<ಕುಳಿತುಕೋ>
ಖಾಲಿ... ಇಲ್ಲ...< ಎಲ್ಲಾದರೂ ಚಂದಮಾಮ ಬಂದರೆ ಅಂಥಾ ಖಾಲಿ ಅಂತ ಹಾಡಿನ ತುದಿ>
ನನ್ನ ರಚನೆ:
ಮಮ್ಮ ಬಂದಳೇನೆ
ಪಪ್ಪಾ ಬಂದರೇನೆ ...
 ಇದು ನಾನು ಅವನು ಹಸುಗೂಸು ಇರುವಾಗ ಹೇಳುತ್ತಿದ್ದೆ.
ಅದು ಅವನ ಮನದಲ್ಲಿ ನೆಲೆಯೂರಿದ್ದು ಈ ರೀತಿ :
ಮಮ್ಮನೆನೆ ಪಪಾನೆನೆ ಪಾಪುವೇನೆ
ನೆನೆ ನೆನೆ
ಪಪ್ಪಲೇನೆ<ಚಪ್ಪಲ್>
ಬೌ ಬೌ ವೇನೆ
ತಾರ್ ಏನೇ<ಸ್ಟಾರ್>
ಅಜ್ಜ ಏನೇ.......
ಹೀಗೆ ಅವನ ನಿಘಂಟಿನ  ಬುಟ್ಟಿಯೊಳಗೆ ಸೇರಿರುವ ಪದಗಳೆಲ್ಲ ಸೇರುತ್ತಿವೆ.
  
                               ಮಗುವಿನ ಜೊತೆ ...ಮಗುವಾಗುವ    ಮನಸು      
                               ಚಂದ್ರಿಕಾ ಹೆಗಡೆ                    

ಕಾಲವೇ ಕೇಳು

ಕಾಲವೇ ,
ಅಂಬೆಗಾಲಿಡದ  ಕೂಸು
ಚೀರಾಡುತ್ತಿದೆ
ಕೇಳುವವರಿಲ್ಲ !
ಚೂರಾದ ಹೃದಯದಲ್ಲಿ
ಪ್ರೀತಿ ಸಿಂಚನಕ್ಕಾಗಿ
ಕಾದು ಕುಳಿತಿರುವವರಿಲ್ಲ.
ಸುಕ್ಕುಗಟ್ಟಿದ ಮುಖಕ್ಕೆ
ಮೊಡವೆ - ಗೊಡವೆ ಇಲ್ಲ:
ಇದ್ದರೂ ಮದ್ದು ಹುಡುಕುವವರಿಲ್ಲ.
ಆಗಸದ ಬಾಗಿಲಿನಲ್ಲಿ
ಕಾದು ಕುಳಿತಿಹ ನಕ್ಷತ್ರಗಳ
ಎಣಿಸುವವರಾರು?
ಕಾರ್ಗತ್ತಲಿನ- ಮನದ ಮೂಲೆಯಲ್ಲಿ
ವಿಷವು ಬಿಟ್ಟಿರುವದನ್ನು
ಕಾಣುವವರಾರು?
ಸೋತ ಮನದ ಸಾಲಿನಲ್ಲೂ
ಗೆಲುವ ಭಾವವ
ಗುರುತಿಸುವವರಿಲ್ಲ.
ಕಾದಾಡುವ ಜನಕ್ಕೆ
ಜಗಳ ಕಾಯುವ ತವಕ!
ಬಿಡಿಸುವವರಿಗೆ ಗತಿಯಿಲ್ಲ.
ಪುಗಸಟ್ಟೆ ಸಿಕ್ಕ ಜಾಗಕ್ಕೆ
ಮನೆ- ಮನ ಅರ್ಪಣೆ
ಈ ಜನಕ್ಕೆ ಕೊರತೆ? ಇಲ್ಲ.
ಸನ್ನಿ ಹಿಡಿದ ಬಾಣಂತಿಗೆ
ಉಪಚಾರ ಮದ್ದು- ಹೊರತು  
ಗಂಡೇ?    ಹೆಣ್ಣೇ?... ಮುಖ್ಯವಲ್ಲ.
ಕೂಡಿಟ್ಟ ಹಣವೆಲ್ಲಾ
ಉಪಯೋಗದ ಗತಿಯಲ್ಲಿ...
ಕಪ್ಪಾಗುವದು ಬೇಕಿಲ್ಲ.
ಕಾಲವೇ  ಕೇಳಿಲ್ಲಿ , ನಿಲ್ಲದಿರು
ನೀ ಕಾದಷ್ಟು , ಕುಳಿತಷ್ಟೂ,
ಹೇಳುವವರಿಲ್ಲ, ಕೇಳುವವರಿಲ್ಲ!
                          
                          ಚಂದ್ರಿಕಾ ಹೆಗಡೆ

                                                                  

ಮುಗಿದ ಕಾಯುವಿಕೆ

ಆಕೆ ಕಂಗೆಟ್ಟಿದ್ದಾಳೆ_

ಕಾಳ ರಾತ್ರಿಯ ಆಗಮನವಾದಂತೆಲ್ಲಾ 

ಕಣ್ ಕಟ್ಟಿವೆ...

ಕಣ್ಣ ಗೊಂಬೆ ಮಸುಕಾಗುತ್ತಲೇ 

ತಳಮಳದ ಒಡಲಾಗ್ನಿ 

ಕುದಿ ಕುದಿವ ಮನವಿರಲು 

ತಿಂದ ತಿನಿಸು , ಕಂಡ ಕನಸುಗಳೆಲ್ಲಾ 

ಕ್ಷಣಾರ್ಧದಲ್ಲೇ  ಭಗ್ನ !

ಕಪೋಲಗಲೆರಡರಲ್ಲಿ  ಕಣ್ಣೀರಿನ 

ಒರತೆ? ಕಾಣುವ ಲಕ್ಷಣವಿಲ್ಲ. 

ಬತ್ತಿದೆ- ಅದರ ಛಾಯೆ 

ಮಸುಕಾದ ಸೆರಗ ತುದಿ ಕೈಯಲ್ಲಿ 

ಛಾಯೆ ತೊಡೆಯುವ ಯತ್ನ!

ಮಡಿಲ ಕೂಸಿನ ಉಸಿರು, ಆಹಾರ 

ಸಿಗತೊಡಗಿದೆ ಯಾಂತ್ರಿಕ 

ಜೋಪಾನದಲ್ಲೂ ...

ನಲಿದಾಟ ನೆನಪಿನಲ್ಲಿ 

ಪ್ರೀತಿಯಿದೆ ಮನ-ಮಗುವಿನಲ್ಲಿ 

ಅನುರಾಗ ಸ್ಪಂದನಕೆ ಜಾಗವೆಲ್ಲಿ ಇನ್ನು? 

ಮಗು ಮಿಸುಕಾಟ ಭಾಗ್ಯ 

ನೆಮ್ಮದಿ ಇದರಲ್ಲಿ 

ಹುಡುಕಾಟ... ಇನಿಯನ ಆಸರೆ ಇನ್ನೆಲ್ಲಿ?

ಗುಂಡು ಸದ್ದಿನ ಮಾಯೆ 

ಹೋದ ಗಂಡನ ನೆನಪು 

ಗೋಳು ಕೇಳುವ ಜನಕೆ ಪುರುಸೋತ್ತೆಲ್ಲಿ?

ಕಡುಗಲಿಯ ನೆನಪು ಮಾತ್ರಾ ಆಕೆಯಲ್ಲಿ....

                                                    ಕಡುಗಲಿಗಳ ನೆನಪಿನಲ್ಲಿ ಇರುವ ಎಷ್ಟೋ ಸ್ತ್ರೀಯರಿಗೆ ಈ ಕವನ ಅರ್ಪಣೆ ..

                                                         ಚಂದ್ರಿಕಾ ಹೆಗಡೆ 

ಗಜ್ಜರಿ ಪಾಯಸ

 ನಾನು ಇದನ್ನು ಧಾರವಾಡದಲ್ಲಿ ಎಂ. ಎ  ಪಿಎಚ್.ಡಿ  ಮಾಡಲು ಹಾಸ್ಟೆಲ್ನಲ್ಲಿ ಇದ್ದಾಗ , ಅಲ್ಲಿ ಮೆಸ್ಸ್  ಆಂಟಿ ಹತ್ರಾ ಕಲಿತಿದ್ದು. ಮಾದೇವಿ ಆಂಟಿಗೆ ಥ್ಯಾಂಕ್ಸ್ .....

ಅಗತ್ಯಗಳು: 

ಗಜ್ಜರಿ   ೫< ೫ಜನರಿಗೆ >

ಹಾಲು  ಅರ್ಧಾ ಲೀಟರ್ 

ಸಕ್ಕರೆ ೫ ಚಮಚ 

ತುಪ್ಪ ೩ ಚಮಚ 

ಬೇಕಾದರೆ ಗೋಡಂಬಿ .. ಬಾದಾಮಿ ಚೂರುಗಳು 

ಮಾಡಲೇ ಬೇಕಾಗಿದ್ದು: 

ಮೊದಲು  ಗಜ್ಜರಿಯನ್ನು ತೊಳೆದು ಮೇಲಿನ ಪದರವನ್ನು ತೆಗೆದು... ಸ್ವಚ್ಚಮಾಡಿ. ಗಜ್ಜರಿಯನ್ನು ತುರಿದು  ತುಪ್ಪ ಹಾಕಿ  ಸಣ್ಣ ಉರಿಯಲ್ಲಿ ಹುರಿದುಕೊಳ್ಳಿ. ಸ್ವಲ್ಪ ಆರಿದಮೇಲೆ ಆ ಹುರಿದ ಗಜ್ಜರಿಯ ತುರಿಯನ್ನು ಮಿಕ್ಸಿಯಲ್ಲಿ ಒಂದು ಕ್ಷಣ  ತಿರುಗಿಸಿ. ೧ ಕ್ಷಣ ಇದು ನೆನಪಿರಲಿ. ಆಮೇಲೆ ಈ  ಪುಡಿಯಾದ ಗಜ್ಜರಿಯನ್ನು ದಪ್ಪ ತಳದ ಪಾತ್ರೆಯಲ್ಲಿ ಹಾಲಿನೊಂದಿಗೆಸಕ್ಕರೆ ಹಾಕಿ  ೧೦ ನಿಮಿಷ  ಕುದಿಸಿ. ಗೋಡಂಬಿ  ಚೂರುಗಳನ್ನೂ ಕುದಿಯುವಾಗಲೇ ಹಾಕಿ. ಗೋಡಂಬಿಯನ್ನು ಹುರಿಯಬಾರದು. ಈ ಪಾಯಸ ಬಿಸಿಯಾಗಿರುವದಕಿಂಥ ಫ್ರಿಡ್ಜ್ ನಲ್ಲಿ ಇಟ್ಟು ತಂಪಾಗಿಸಿದರೆ ಇನ್ನು ರುಚಿಯೆನಿಸುವದು. ಇದಕ್ಕೆ ಬೇಕಾದರೆ ಖೋವಾ ಹಾಕಬಹುದು. 

ಬಣ್ಣ ಕೂಡಾ  ನೋಡಲು ಚೆಂದ. 

ಫೋಟೋ ನಾನು ಗೂಗಲ್ ನಿಂದ  ತೆಗೆದುಕೊಂಡಿದ್ದೇನೆ.  ಸಧ್ಯ ಈ ಪಾಯಸ ಮಾಡಿರದ ಕಾರಣ!

ಸಹಪಥಿಕನಲ್ಲಿ ...

 ಮಲ್ಲಿಗೆಯ ಮಾಲೆಯನು   ಹಿಡಿದು ನಿನ್ನಲ್ಲಿ ಬಂದೆ

ನೀನು ಕಾಯುವ ಹಾದಿ ನಾ ಬಲ್ಲೆನಲ್ಲ.  

ನಾ ಹಿಡಿದ ಮಲ್ಲಿಗೆಯು ನಿನ್ನಲ್ಲಿಯ ಸಂಪಿಗೆಯು 
ಏರುವವು ಊರ ಮುಂದಿನ ದೇವರಿಗೆಯೇ! 


ನಾ ಹೇಳುವ ಮಾತು ನಿನ್ನಲ್ಲಿಯೂ ಇದೆ 
ಸಿರಿತನಕ್ಕೂ ಮಿಗಿಲಾಗಿದೆ ನಿನ್ನಲ್ಲಿಯ ಸ್ನೇಹ .
ಮನ ಹಗುರಾಗಲು ,ತನುವಿಗೆ ಹಿತವೆನಿಸಲು 
ನಿನ್ನದೊಂದು ಸ್ಪರ್ಶ ಸಾಕೆನಲೇ?


ಅಂದು ಹಿಂದಿನ ಮಾತು ಸಂದರ್ಭಕ್ಕನುಸಾರಿ 
ಪುನಃ  ಏಳುವ ಭಾವ ಪ್ರೀತಿಯೊಂದೇ.
ನೀನು ಸಂಯಮಿ, ನಾನು ಸ್ನೇಹಾಕಾಂಕ್ಷಿ
ನಮ್ಮಿಬ್ಬರ ಮನವೀಗ ಹಾಯಾಗಲು.


ಬಂದ ಭಾವಕ್ಕೊಂದು ರೂಪುಕೊಡಲೆಮಗೆ 
ಸಂಪ್ರೀತವೆನಿಸಿದೆ  ಜೀವಕ್ಕೆಲ್ಲ .
ದೊರೆತ ಹಿರಿಯರ ಹಾರೈಕೆ, ಜತೆಯಿರಲು ನಮಗೇಕೆ 
ಜೋಕೆ ಎನ್ನುವ ಮಾತು ಇನ್ನು ಬೇಕೇ.? ......
                                                             ಪ್ರೀತಿಯ ಸಿರಿತನದ ಸವಿಯಲ್ಲಿ....
                                                             ಚಂದ್ರಿಕಾ ಹೆಗಡೆ .