ಸ್ವಾತಂತ್ರ್ಯ

ತಲುಪಲೇ ಬೇಕು ತಿಳಿದಲ್ಲಿಗೆ

ಬೇಕಾದ ಅಗಲಳತೆಗಳಲ್ಲಿ ಹೋಗುವ

ಮನ ಹುಮ್ಮಸ್ಸನ್ನು ಕೈಯಲ್ಲಿ ಹಿಡಿದು ,

ಕ್ಷಣ , ಕೊಂಚ ತಪ್ಪಿದರೂ

ನೋವು- ಸಾವು ಕಟ್ಟಿಟ್ಟ ಬುತ್ತಿ

ದಾರಿ- ಗೆರೆ ಎಳೆದಿದೆಯಲ್ಲ !

ಮಾರ್ಗದರ್ಶಿ ಯಾಕೆ ? ಹೌದಲ್ಲ.

ಕಗ್ಗತ್ತಲಿನ ದುರ್ಗಮ ದಾರಿ

ಮುಗಿದಿದೆ. ಚಿಂತೆ ಬಿಡು .

ಬೆಳಕಿನ ಸ್ವಚ್ಛಂದತೆ ಸಿಗಲಿದೆ

ಕ್ಷಣಾರ್ಧದಲ್ಲಿಯೇ

ಮನದ ಬೇಗುದಿಯ ಬಿಸುಡಿಬಿಡು

ಸ್ನಿಗ್ಧತೆ, ಸ್ವತಂತ್ರತೆ ಹೊರಗಿದೆಯಲ್ಲ

ನಡೆಯುತ್ತೀಯಾ ? ಓಡುತ್ತಿರುವೆಯಾ !

ಬೆಳಕಿನ ಸನಿಹ ಜಾರುತ್ತಿರುವೆ-

ತಿಳಿದಿದೆ ನನಗೆ

ನೀನು ಬಂದ, ನಿನಗೆ ಸಂದ

ಕಷ್ಟ ಕೋಟಲೆಗಳ ಪರಿ

ನೆನಪಾಗದಿರಲಿ ಮತ್ತೊಮ್ಮೆ

ಹಳೆಯ ಬೇಗೆ - ಉಸಿರುಗಟ್ಟಿಸುವಿಕೆ

ದಾಟಿ ಬಿಡು ಕತ್ತಲೆಯ ಮನಸ್ಥಿತಿಯ

ಸ್ವಚ್ಚ ನಿಸರ್ಗಧಾರೆಯಲ್ಲಿ

ಒಂದಾಗಿ ಬಿಡು

ಸರ್ವ ತಂತ್ರ ಸ್ವತಂತ್ರವಾಗಿ ...

ಸ್ವತಂತ್ರತೆಯ ಸದಾ ಅನುಭವದಲ್ಲಿ...

    ಚಂದ್ರಿಕಾ ಹೆಗಡೆ .